КӮДАКОН-ДУНЁИ МОЯНД! Бахшида ба Рӯзи байналмилалии ҳифзи кӯдакон дар шаҳри Норак барномаи идона доир шуд

НОРАК, 01.06.2024. /АМИТ «Ховар»/. 31 май бахшида ба Рӯзи байналмилалии ҳифзи кӯдакон дар Қасри фарҳанги шаҳри Норак бо ҷалби кӯдакону наврасон ва волидайни онҳо барномаи идона баргузор гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Норак иттилоъ доданд.

Дар ҳамоиш Раиси шаҳри Норак Фирӯза Шарифӣ бо дастовардҳои кӯдакону наврасон ва ҳунарҳои мардумӣ, ки ҳама маҳсули дастони наврасону кӯдакон буданд, шинос шуд.

Иброз гардид, ки ҳар сол чун анъана 1 июн чун Рӯзи байналмилалии ҳифзи кӯдакон аз ҷониби аҳли башар таҷлил мегардад. Бо шарофати сиёсати оқилона ва хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳифзу ҳимояи оила, кӯдак ва волидайн меҳвари давлатдории навини тоҷикон маҳсуб шуда, рукни муҳими ҳаёти ҷамъиятӣ ба шумор меравад.

Дар замони соҳибистиқлолии Тоҷикистон бо ҳидояту роҳнамоии Пешвои муаззами миллат таъмини ҳуқуқу манфиатҳои кӯдакон таҳти назорати доимии давлату Ҳукумати Ҷумҳурии Тоҷикистон қарор дорад.

Ҳамзамон ба ғолибони озмунҳо ва хурдсолон туҳфаҳои идона супорида шуданд. Барномаи ҷолиби консертӣ табъи кӯдакону наврасонро болида гардонид.

АКС: Мақомоти иҷроияи ҳокимияти давлатии шаҳри Норак