Таътили тобистона дар Чемпионати Тоҷикистон-2024 байни дастаҳои Лигаи олӣ фаро расид

ДУШАНБЕ, 03.07.2024 /АМИТ «Ховар»/. Дар Чемпионати Тоҷикистон-2024 байни дастаҳои Лигаи олӣ таътили тобистона фаро расид, ки тақрибан як моҳ идома меёбад. Дар ин хусус шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон хабар медиҳад.

Пешсафи феълии чемпионат -дастаи футболи «Истиқлол»-и шаҳри Душанбе аст, ки пас аз 11 бозӣ 33 имтиёз ба даст овард. Тими КМВА-и шаҳри Душанбе дар зинаи дуюм (25 хол, 12 бозӣ) мебошад. Ҷойи сеюмро дастаи футболи «Хуҷанд»-и шаҳри Хуҷанд (22 хол, 12 бозӣ) соҳиб гардидааст.

Хотиррасон мешавем, ки нимаи дуюми мавсим бо бозиҳои аввали даври 1/8 ниҳоии Ҷоми Тоҷикистон-2024, ки 27, 28 ва 29 июл баргузор мешаванд, оғоз мегардад.

Беҳтарин нишонзанҳо пас аз 12 даври Лигаи Олӣ Манучеҳр Ҷалилов аз дастаи футболи «Истиқлол»-и шаҳри Душанбе — 10 гол, инчунин Элеке Чибуеке Блессинг аз дастаи «Истиқлол»-и шаҳри Душанбе, Артём Сердюк аз дастаи «Хуҷанд»-и шаҳри Хуҷанд, Ҷаҳонгир Эргашев аз дастаи футболи «Эсхата»-и шаҳри Хуҷанд — бо 6 гол, Алишер Ҷалилов аз дастаи «Истиқлол»-и шаҳри Душанбе ва Шериддин Бобоев аз дастаи «Ҳосилот»-и ноҳияи Фархор – 5 голӣ мебошанд.

Ёдовар мешавам, ки аз 1 июли соли равон равзанаи гузариш дар Чемпионати Тоҷикистон боз гардида, то 28 июли соли 2024 идома меёбад.

Дар ин равзана дастаҳо имкон доранд, ки бозингарони навро ҷалб карда, барои иштирок дар мусобиқаҳои зерини Лигаи футболи Тоҷикистон сабт намоянд:

Лигаи Олӣ | Даври 13

9 август | 19:00

«Барқчӣ» – «Истаравшан».
«Регар-ТадАЗ» — «Куктош».

10 август | 19:00

«Вахш» – «Истиқлол».
«Ҳосилот» — «Хуҷанд»

11 август | 19:00

КМВА – «Эсхата»
«Панҷшер» — «Равшан».

АКС: Федератсияи футболи Тоҷикистон