35-СОЛАГИИ ИСТИҚЛОЛИ ДАВЛАТӢ. Дар шаҳру ноҳияҳои вилояти Хатлон 3090 иншоот мавриди истифода қарор гирифт

ДУШАНБЕ, 10.08.2024. /АМИТ «Ховар»/. Ба ифтихори ҷашни муқаддаси 35-солагии Истиқлоли давлатии Ҷумҳурии Тоҷикистон корҳои ободонию созандагӣ идома дошта, ба ҳолати 1 июли соли 2024 дар шаҳру ноҳияҳои вилояти Хатлон аз 6260 иншооти нақшавӣ 3090 иншоот ба маблағи 2,5 миллиард сомонӣ сохта, ба истифода дода шуд. Дар ин хусус Раиси вилояти Хатлон Давлаталӣ Саид 9 август зимни нишасти матбуотӣ ба хабарнигорон иттилоъ дод.

«Дар 6 моҳи имсол дар доираи нақшаи чорабиниҳо 685 иншоот, аз ҷумла 50 иншооти соҳаи маориф, 7 дармонгоҳ, 22 иншооти варзишӣ, 55 иншооти соҳаи кишоварзӣ ва 171 иншооти хизматрасонӣ мавриди истифода қарор гирифт», -гуфт Раиси вилоят.

Таъкид шуд, ки дар ин раванд 6539 ҷойи кор таъсис дода шуда, барои зиёд намудани шумораи иншооти ҷашнӣ дар шаҳру ноҳияҳои вилоят дар умум 739 иншоот ба таври илова ба нақшаи чорабиниҳо ворид карда шуд. Корҳо дар ин самт батадриҷ амалӣ мешаванд.

Раиси вилоят саҳми соҳибкорони маҳаллиро дар рушди соҳаи саноат назаррас хонда, гуфт, ки бо ҷалби онҳо дар шаҳру ноҳияҳои вилоят дар шашмоҳаи якуми имсол 40 коргоҳу корхонаи истеҳсолӣ бо 343 ҷойи кор бунёд ва мавриди истифода қарор дода шуд.

АКС аз бойгонӣ