Дар Москва дар мавзуи «Саҳми Ибни Сино дар ташаккули соҳаи тиб: осори илмӣ, таҷриба ва назария» ҳамоиш баргузор гардид
ДУШАНБЕ, 24.08.2024 /АМИТ «Ховар»/. Бо ташаббуси Шурои ҷамъиятии назди Сафорати Ҷумҳурии Тоҷикистон дар Федератсияи Русия дар ҳамкорӣ бо Муассисаи буҷетии давлатии шаҳри Москва «Хонаи миллатҳои Москва» ба бузургдошти мутафаккири барҷастаи тоҷик Абуалӣ ибни Сино дар мавзуи «Саҳми Ибни Сино дар ташаккули соҳаи тиб: осори илмӣ, таҷриба ва назария» ҳамоиш баргузор гардид. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Федератсияи Русия хабар медиҳад.
Дар ҳамоиш намояндагони миллатҳои гуногун аз Эрон, Ҳиндустон, Покистон, Қирғизистон, Арманистон, мақомоти дахлдори Русия, коршиносон, алоқамандони осори илмию адабии Ибни Сино, олимону муҳаққиқон, ординаторон, донишҷӯёни муассисаҳои таҳсилоти тиббӣ, кормандони соҳаи тиб ва тоҷикони муқими Федератсияи Русия иштирок намуданд.
Таъкид гардид, ки «Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тарғиб ва муаррифии чеҳраҳои таърихиву фарҳангии миллати тоҷикро, ки дар замони соҳибистиқлолии мамлакат ба идеологияи ваҳдати миллӣ ва худшиносии тоҷикон дар дохил ва хориҷи ҷумҳурӣ мусоидат менамояд, хеле муҳим ва зарур арзёбӣ намуданд. Гузашта аз ин, ба хотири гиромидошти ин шахсияти бузург Донишгоҳи давлатии тиббии Тоҷикистон ба номи Абуалӣ ибни Сино гузошта шуда, дар Академияи миллии илмҳои Тоҷикистон маркази Синошиносӣ таъсис ёфт. Ҳамчунин номи яке аз калонтарин ноҳияҳои шаҳри Душанбе ба номи Сино гузошта шудааст, ки мояи ифтихору сарфарозии мо аст».
Дар ҳамоиш коршиносон ва муҳаққиқон ҷанбаҳои илмӣ-назариявӣ ва таҷрибаи амалии мутафаккири барҷаста дар илми тиб, инчунин андешаҳои фалсафавӣ ва омӯзгории ӯро мавриди омӯзиш қарор дода, дар робита ба ин мулоҳизаронӣ намуданд.
Дар доираи ҳамоиш бо мақсади шиносоӣ бо ҳаёт ва фаъолияти олими бузург намоиши филми мустанад, хона-музей, утоқи корӣ, асбоб ва лавозимоти истифодашавандаи тиббии замони ҳаким Ибни Сино ва китобҳо аз осори илмии ӯ ба маърази тамошои иштирокчиён гузошта шуд.
Бояд таъкид намуд, ки дар ҳошияи чорабинӣ аз ҷониби сармутахассиси Маркази арабшиносӣ ва исломшиносии Пажуҳишгоҳи шарқшиносии Академияи илмҳои Русия Иброҳим Тауфиқ Камел тарҷумаи осори дуҷилдаи Ибни Сино ба забони русӣ «Ибн-Сина (Авиценна) Исцеление. Теология» муаррифӣ гардид.
АКС: Сафорати Ҷумҳурии Тоҷикистон дар Федератсияи Русия
Имсол дар истироҳатгоҳи беруназшаҳрии «Шарора» 720 нафар кӯдакону наврасон таътили худро босамар мегузаронанд
ТАЪТИЛИ БОФАРОҒАТ. Имсол 1000 нафар кӯдаку наврас ба истироҳатгоҳи беруназшаҳрии «Зимчуруд» ҷалб мегарданд
Дар Тоҷикистон даври сеюми Форуми коршиносони Осиёи Марказӣ — Корея доир мешавад
Дар Душанбе маъракаи хунсупории шаҳрвандон доир гардид
Байни Кумита оид ба таҳсилоти ибтидоӣ ва миёнаи касбии Тоҷикистон ва Ташкилоти ғайридавлатии «Good Neighbors» Ёддошти тафоҳуми ҳамкорӣ ба имзо расид
Дар Чин дастовардҳои Тоҷикистон дар самти ҳуқуқи инсон муаррифӣ гардиданд
Дар Тоҷикистон беморони диабети қанд метавонанд инсулини ройгон дастрас намоянд
Иштирокдорони Форуми байналмилалии ҳизбҳои сиёсӣ дараи Алмосӣ ва Қалъаи Ҳисорро тамошо карданд
Форуми байналмилалии ҳизбҳои сиёсӣ зери унвони «Ҳизбҳои сиёсӣ ва уфуқҳои нави ҳамкорӣ» доир гардид
АБУАЛӢ ИБНИ СИНО — МУТАФАККИРИ БУЗУРГИ ШАРҚ, ФАРЗАНДИ ФАРЗОНАИ ХАЛҚИ ТОҶИК. Андешаҳои академик Фарҳод Раҳимӣ дар ин мавзуъ
Оқибатҳои офатҳои табиӣ дар мавзеъҳои хатарноки роҳҳои минтақаи Рашт бартараф карда шуданд
Табибони тоҷик дар Туркия малакаи касбиии худро такмил медиҳанд
