СОЛҲОИ РУШДИ САНОАТ. Дар Суғд 91 коргоҳу корхонаи саноатӣ ба истифода дода шуд

ДУШАНБЕ, 25.08.2024. /АМИТ «Ховар»/.  Дар шашмоҳаи якуми имсол дар вилояти Суғд 91 корхонаву коргоҳи нав бо 587 ҷойи нави кор дар самти истеҳсоли дару тиреза, тахтасанги мармарӣ, мебел, равғани растанӣ, хӯроки чорво, машрубот, маҳсулоти ширию қаннодӣ ва пойафзол ифтитоҳ гардид.

Тавре ба АМИТ «Ховар» дар Раёсати сармоягузорӣ ва идораи молу мулки давлатии вилояти Суғд хабар доданд, аз ҷумла дар корхонаи истеҳсолии Ҷамъияти дорои масъулияти маҳдуди «Титан 8888», ки имсол ба истифода дода шуд, асосан радиатор — таҷҳизоти гармидиҳӣ, дегҳои гуногунҳаҷм барои рӯзгор ва чароғакҳои равшанидиҳанда истеҳсол мешаванд.

Дар корхона бо истифода аз хатҳои муосири технологӣ, ки аз ширкатҳои бонуфузи Чин, Туркия ва Русия ворид карда шудаанд, дар як моҳ 500 тонна ва дар як сол 6 ҳазор тонна партови алюминий коркард ва аз он маҳсулоти тайёр истеҳсол мешавад.

Ҳоло дар корхона 2 намуд таҷҳизоти гармидиҳӣ, 3 намуд чароғакҳои равшанидиҳанда ва зиёда аз 20 намуд дег барои рӯзгор, ки ҳаҷмаш аз 2 то 300 литрро ташкил медиҳад, бо дизайни хос ва сифати баланд истеҳсол мешаванд.

Корхонаи саноатии Ҷамъияти дорои масъулияти маҳдуди «Титан 8888», ки дар Тоҷикистон аз аввалин истеҳсолкунандагони радиатор — таҷҳизоти гармидиҳӣ, дегҳои ҳаҷму андозаашон гуногун барои рӯзгор ва чароғакҳои равшанидиҳанда мебошад, дар роҳи рушди истеҳсолоти ватанӣ, инчунин ташкили ҷойи кори нав иқдоми муҳиму саривақтӣ мебошад.

АКС аз манбаъҳои боз