Ҷавонони синни даъватӣ бо ихтисоси мутахассис-ронандаи мошинҳои гаронвазн ба хизмати Ватан мераванд

ТУРСУНЗОДА, 29.09.2024 /АМИТ «Ховар»/. Барои омода намудани ронандагони мутахассис дар сафи Қувваҳои мусаллаҳи ҷумҳурӣ имрӯзҳо дар Мактаби муттаҳидаи техникии шаҳри Турсунзода аз ҳисоби Вазорати мудофиаи Ҷумҳурии Тоҷикистон 80 нафар ҷавонони синни даъватӣ касби ронандагии дараҷаи «С» ва «С-акумуляторчӣ» мехонанд. Аз ин шумора 30 нафар аз шаҳри Турсунзода, 30 нафар аз шаҳри Ҳисор ва 20 нафар аз ноҳияи Шаҳринав мебошанд, ки дар маъракаи даъвати тирамоҳӣ ба сафи Қувваҳои Мусаллаҳи ҷумҳурӣ ҳамроҳ мегарданд. Дар ин хусус муовини сардори Мактаби муттаҳидаи техникии шаҳри Турсунзода Аъзам Саидзода ба хабарнигори АМИТ «Ховар» Субҳониддини Маҳмуд иттилоъ дод.

Масъулини Мақомоти иҷроияи ҳокимияти давлатии шаҳри Турсунзода гуфтанд, ки «аз ҳисоби ҳукумати шаҳри Турсунзода имрӯзҳо аз ҷамоатҳои шаҳраку деҳот 270 нафар ҷавонони синни даъватӣ аз рӯйи касби мутахассис — ронандаи дараҷаи «С» дар Мактаби муттаҳидаи техникии шаҳр таҳсил доранд, ки дар иҷрои нақшаи даъвати тирамоҳии шаҳри Турсунзода нақши асосӣ доранд».

Роҳбарияти  Мактаби автомобилии Ташкилоти ҷамъиятии мададгори мудофиа дар шаҳри Ваҳдат гуфтанд, ки «тибқи нақшаи даъвати ҷавонон ба сафи Артиши миллӣ, дар фасли тирамоҳ аз ҳисоби Вазорати мудофиа 45 даъватшаванда аз шаҳрҳои Ваҳдату Роғун ва ноҳияи Файзобод дар давраи омӯзишӣ ҳамчун мутахассис- ронандаи мошинҳои гаронвазн хонда истодаанд».

Аз ҳисоби Мақомоти иҷроияи ҳокимияти давлатии шаҳри Ваҳдат 270 даъватшаванда имрӯзҳо касби ронандагӣ меомӯзанд, ки ҳамаи онҳо ба таври ихтиёрӣ ҳамчун мутахассис дар даъвати ҳарбии тирамоҳӣ ба сафи Артиши миллӣ ҳамроҳ мегарданд».

Тибқи иттилои масъулини Мақомоти иҷроияи ҳокимияти давлатии шаҳри Ваҳдат,  имрӯзҳо 421 нафар даъватшавандагон ба таври ихтиёрӣ барои пайвастан ба сафи Артиши миллӣ ба Камисариати ҳарбии шаҳр  муроҷиат намудаанд.