Рӯзи Истиқлолияти давлатии Ҷумҳурии Тоҷикистон дар хориҷи мамлакат таҷлил карда шуд

ДУШАНБЕ, 11.09.2024 /АМИТ «Ховар»/. Ба муносибати 33-солагии Истиқлолияти давлатии Ҷумҳурии Тоҷикистон намояндагиҳои дипломатӣ ва муассисаҳои консулии Тоҷикистон дар хориҷи мамлакат барномаҳои тантанавӣ баргузор намуданд. Зимни чорабиниҳо роҳбарони муассисаҳои хориҷӣ аз дастовардҳои назарраси Тоҷикистон дар даврони истиқлолият ёдовар шуда, саҳми арзандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар бунёди Тоҷикистони соҳибистиқлол, ҳуқуқбунёд, дунявӣ, демократӣ ва нақши афзояндаи мамлакатро дар арсаи байналмилалӣ таъкид намуданд. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

6 сентябри соли 2024 дар Сафорати Ҷумҳурии Тоҷикистон дар Ҷумҳурии Беларус чорабинӣ барпо гардид. Ҷашн дар фазои дӯстӣ ва ҳусни тафоҳум баргузор шуда, намояндагони ҷамъияти тоҷикон, донишҷӯён ва ҳамватанони муқими Ҷумҳурии Беларусро гирди ҳам овард.

9 сентябри соли 2024 бо ибтикори Сафорати Ҷумҳурии Тоҷикистон дар Ҷопон бо иштироки намояндагони аршади мақомоти давлатӣ, корпуси дипломатӣ, намояндагони ширкату ташкилоти байналмилалӣ ва муассисаҳои олии таълимии Ҷопон чорабинии ҷашнӣ баргузор гардид.

9 сентябри соли 2024 Сафорати Ҷумҳурии Тоҷикистон дар Федератсияи Русия чорабинии тантанавӣ баргузор намуд.

9 сентябри соли 2024 дар Сафорати Ҷумҳурии Тоҷикистон дар Давлати Кувайт чорабинии идона бо иштироки ҳамватанони муқими Кувайт ва донишҷӯёни тоҷик доир гардид.

9 сентябри соли 2024 бо ибтикори Сафорати Ҷумҳурии Тоҷикистон дар Иёлоти Муттаҳидаи Америка дар баробари ҷашни Истиқлолияти давлатӣ шаршараи Ниагара бо рангҳои Парчами давлатии Ҷумҳурии Тоҷикистон фурӯзон шуд. Ҳамзамон бо ташаббуси Сафорат дар маркази шаҳри Ню-Йорк—майдони Таймс Сквер навори ҷашнӣ 24 маротиба (ҳар соат давоми шабонарӯз) пахш гардид.

9 сентябри соли 2024 бо ибтикори Сафорати Ҷумҳурии Тоҷикистон дар Ҷумҳурии Корея бинои Ҳукумати шаҳри Сеул бо рангҳои Парчами давлатии Тоҷикистон оро дода шуд.

9 сентябри соли 2024 бо ташаббуси Сафорати Ҷумҳурии Тоҷикистон дар Ҷумҳурии Туркия  бо мақсади арҷ гузоштан ба Истиқлоли давлатӣ Парчами давлатии Тоҷикистон дар Манораи “Ҷумҳурият”-и ноҳияи Кечиорени Анқара намоиш дода шуд.

АКС: Вазорати корҳои хориҷии Ҷумҳурии Тоҷикистон