Вакили Маҷлиси намояндагони Тоҷикистон дар машварат оид ба мутобиқшавӣ ба тағйирёбии иқлим сухан гуфт

ДУШАНБЕ, 18.10.2024. /АМИТ «Ховар»/. Имрӯз бо ташаббуси комиссияи доимии Ассамблеяи байнипарлумонии Иттиҳоди Давлатҳои Мустақил оид ба сиёсати аграрӣ, захираҳои табиӣ ва экологӣ дар қасри Таврическийи шаҳри Санкт-Петербурги Федератсияи Русия машварат оид ба мутобиқшавӣ ба тағйирёбии иқлим баргузор гардид, ки дар кори он Раиси комиссияи экологии Маҷлиси намояндагони Маҷлиси Олии Ҷумҳурии Тоҷикистон Муҳаммадраҳим Юсуфӣ ба тариқи фосилавӣ иштирок намуд, хабар медиҳад АМИТ «Ховар» бо истинод ба Маҷлиси намояндагон.

Ҳадафи асосии машварат таҳлили мушкилоти мутобиқшавӣ ба тағйирёбии иқлим дар кишварҳои аъзои Иттиҳоди Давлатҳои Мустақил мебошад.

Дар ҳамоиш намояндагони парлумонҳои миллӣ, ҳукуматҳои минтақавӣ ва маҳаллӣ, вазоратҳои дахлдор, кумитаи иҷроияи Иттиҳоди Давлатҳои Мустақил, инчунин коршиносони даъватшуда аз кишварҳои аъзои Иттиҳоди Давлатҳои Мустақил, созмонҳои байналмилалӣ, муассисаҳои таълимӣ ва илмӣ вобаста ба мушкилоти мутобиқшавӣ ба тағйирёбии иқлим сухан намуданд.

Дар ҷаласа проблемаҳои тағйирёбии иқлим дар фазои Иттиҳод, мушкилоти таъминоти илмию технологии мутобиқшавӣ ба тағйирёбии иклим, муайян намудани таҷрибаҳои беҳтарини мутобиқшавӣ ба тағйирёбии иқлим ва имкони густариши онҳо, проблемаҳои таъсири тағйирёбии иқлим ба саломатии аҳолӣ, ҳамкории байналхалқӣ, проблемаҳои танзими ҳуқуқии мутобиқшавӣ ба тағйирёбии иқлим, масъалаҳои нигаҳдории экосистемаи кӯҳӣ ва муҳити зисти аҳолии маҳаллӣ бо назардошти тағйирёбии иқлим мавриди баррасӣ қарор гирифтанд.

Аз рӯйи натиҷаҳои ҷаласа тавсияҳо ба унвони Ассамблеяи байнипарлумонии кишварҳои аъзои Иттиҳоди Давлатҳои Мустақил таҳия карда мешаванд.

АКС: Маҷлиси намояндагони Маҷлиси Олии Ҷумҳурии Тоҷикистон