ЗИМИСТОНГУЗАРОНӢ. «Ангишти Камароб» муассисаҳои буҷетии ноҳияҳои Рашт ва Тоҷикободро бо ангишти хушсифат таъмин намуд
РАШТ, 07.10.2024 /АМИТ «Ховар»/. Ҷамъияти саҳомии кушодаи «Ангишти Камароб» дар асоси нақшаи тасдиқгардида, соли 2024 бояд 70 ҳазор тонна ангишт истихроҷ намояд. Мутахассисону кормандони ин кон то якуми октябри соли равон 45 ҳазору 960 тонна ангишти хушсифат истихроҷ намуда, онро ба корхонаҳои саноатии ҷумҳурӣ ва хоҷагии халқи мамлакат пешниҳод намуданд. Дар ҳолати мусоид омадани боду ҳаво ва наборидани барфи зиёд дар мавзеъҳои баландкӯҳи кони ангишт кормандони Ҷамъияти саҳомии кушодаи «Ангишти Камароб» метавонанд нақшаи истихроҷи ангиштро пурра иҷро намоянд, иттилоъ доданд ба хабарнигори АМИТ «Ховар» Субҳониддини Маҳмуд масъулини ин ҷамъият.
Кони ангишти «Камароб» дар баландии беш аз 3500 метр, дар дараи Камароби ноҳияи Рашт воқеъ мебошад, ки дар фасли тобистон барфи он дер об шуда, дар аввали фасли тирамоҳ боз барф меборад. Аз ҳамин ҳисоб ва тармафароиҳои зиёд роҳҳои мошингард тез-тез вайрон шуда, истихроҷи ангишт мушкил мешавад. Ба ҳамаи ин мушкилиҳо нигоҳ накарда, масъулини Ҷамъияти саҳомии кушодаи «Ангишти Камароб» барои кормандони кон ва меҳмонону ронандагон беҳтарин шароити маишӣ муҳайё намуда, кӯшиш менамоянд нақшаи вобастагардидаро иҷро намоянд.
Муассисаҳои буҷавии ноҳияҳои Рашту Тоҷикобод дар асоси Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2024-2025» бо Ҷамъияти саҳомии кушодаи «Ангишти Камароб» шартнома бастанд. Тибқи ин шартномаҳо ва мувофиқи талаботи муассисаҳои буҷавӣ ноҳияи Рашт бо 2405 тонна ангишт ва сохторҳои буҷавии ноҳияи Тоҷикобод бо 770 тонна ангишти хушсифат сари вақт таъмин шуданд.
Роҳбарияти ширкат дар асоси дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон маъюбону ниёзмандон ва оилаҳои ятимдорро бо ангишти ройгон таъмин менамояд.
Ҷамъияти саҳомии кушодаи «Ангишти Камароб» имконият дорад, ки сохторҳои буҷетии ноҳияҳои Сангвору Нуробод ва Лахшро бо ангишти хушсифат таъмин намояд. Дар сурати муроҷиат намудани масъулини ин ноҳияҳо «Ангишти Камароб» бо сохторҳои буҷетӣ шартнома баста, онҳоро сари вақт бо ангишти хушсифат таъмин менамояд.
АКС аз бойгонӣ
Тоҷикистон лоиҳаи бунёди корхонаи коркарди партовҳои сахти маишӣ ва истеҳсоли неруи барқро аз ҳисоби партовҳо амалӣ менамояд
Ҳукумати Тоҷикистон ҳамкориро бо созмонҳои молиявии байналмилалӣ бо мақсади ҷалби сармоя тақвият медиҳад
Гардиши савдо байни Тоҷикистон ва Эрон қариб 9 миллион доллар афзоиш ёфтааст
Ҳайати Тоҷикистон дар ҷаласаи вазирони молия ва раисони бонкҳои марказии давлатҳои аъзои СҲШ иштирок намуд
Байни шаҳри Хуҷанд ва Бонки аврупоии таҷдид ва рушд Ёддошти тафоҳум ба имзо расид
ТАЪСИСИ 5 ҲАЗОР ҶОЙҲОИ НАВИ КОР. Дар Тоҷикистон 4 корхонаи нави истеҳсоли семент ба истифода дода мешаванд
Раванди татбиқи лоиҳаҳои «Дастгирии соҳаи кишоварзӣ дар заминаи ҷомеа+» ва «Барқарорсозии низоми экологӣ ва устувории кишоварзӣ дар Тоҷикистон» баррасӣ шуд
Дар маҷлиси Ҳукумати Тоҷикистон масъалаи болобарии нархи семент баррасӣ шуд
Намояндагони Тоҷикистон дар чорабинии Ассамблеяи генералии 93-юми Созмони умумиҷаҳонии солимии ҳайвонот иштирок намуданд
Татбиқи лоиҳаҳои афзалиятноки миллӣ ва минтақавӣ дар соҳаҳои кишоварзӣ, ҷангал ва ҳифзи муҳити зист баррасӣ гардид
Ноҳияи Темурмалик нақшаи истеҳсоли пилларо пурра иҷро намуд
Раиси Суди Олии Тоҷикистон бо Раиси Суди иқтисодии Иттиҳоди Давлатҳои Мустақил мулоқот намуд
