ЗИМИСТОНГУЗАРОНӢ. Қариб 500 техникаи роҳнигоҳдорӣ ба мавсими сармо омода аст

ДУШАНБЕ, 20.10.2024 /АМИТ «Ховар»/. Вазорати нақлиёти Тоҷикистон бо мақсади омода намудани сохторҳои марбута ба мавсими  тирамоҳу зимистони солҳои 2024-2025 тадбирҳои зарурӣ андешидааст, иттилоъ медиҳад АМИТ «Ховар» бо истинод ба ин вазорат.

Тибқи хабари манбаъ, ба ҳолати 10 октябри соли равон 34131,5 метри мукааб маводи зиддилағзиш, 153170 литр сӯзишвории дизелӣ, 215,5 тонна ангишт ва 423,8  метри мукааб ҳезум захира карда шудааст.

Инчунин 528 техникаи роҳнигоҳдорӣ -мошинҳои якҷояи роҳдорӣ, автогрейдерҳо,  мошинҳои барфтозакунӣ, булдозерҳо, тракторҳо ва 473 адад дигар техникаҳо ба давраи зимистон пурра омода карда шудаанд, ки ин 89,6% — и нақшаро ташкил медиҳад.  Ҳамзамон 55 техника дар ҳолати таъмир ва муҷаҳҳазгардонӣ қарор дорад.

Бо мақсади таъмини ҳаракати муттасил ва бемонеаи воситаҳои нақлиёт дар роҳҳо ва иҷрои бандҳои дахлдори Қарори Ҳукумати Ҷумҳурии Тоҷикистон аз 30 марти соли 2024 «Дар бораи сари вақт омода намудани соҳаҳои иқтисодиву иҷтимоии ҷумҳурӣ ба фаъолияти мунтазам ва самаранок дар давраи тирамоҳу зимистони солҳои 2024-2025» Нақшаи чорабиниҳои вазорат оид ба сари вақт омода намудани соҳаи нақлиёт ба фаъолияти мунтазам ва самаранок дар давраи тирамоҳу зимистони солҳои 2024-2025 тасдиқ гардида, ситоди фаврӣ таъсис дода шудааст.

АКС аз манбаъҳои боз