Дар Душанбе масъалаи омода намудани мутахассисон дар самти ҳолатҳои фавқулода баррасӣ шуд

ДУШАНБЕ, 18.11.2024. /АМИТ «Ховар»/. Наҷотдиҳандагони Британияи Кабир бо раванди таълим, бозомӯзӣ ва такмили ихтисоси кормандони Маркази ҷумҳуриявии таълимию методии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон шинос шуданд. Дар ин хусус ба АМИТ «Ховар» дар ин кумита хабар доданд.

Меҳмонон ҳамчунин бо майдони тамринии марказ, ки бо воситаҳои техникӣ барои таълими наҷотдиҳандагон муҷаҳҳаз гардидааст, шинос шуданд.

Иброз гардид, ки имконияти фароҳамоварда ба тайёр намудани  мутахассисон барои бартараф намудани ҳолатҳои фавқулода мусоидат менамояд.

Ҳамчунин намояндагони ҷонибҳо масъалаи ҳамкориро барои табодули таҷриба ва таҳияи барномаҳои муштараки таълимӣ ва ҷорӣ намудани технологияҳои инноватсионӣ дар раванди омодасозии мутахассисон барои Кумитаи ҳолатҳои фавқулода ва мудофиаи гражданӣ баррасӣ намуданд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон