Озмуни ҷумҳуриявии «Малакаи касбӣ» ҷамъбаст гардид

Ноябрь 28, 2024 17:02

ДУШАНБЕ, 28.11.2024 /АМИТ «Ховар»/. 40 хонандаи муассисаҳои таҳсилоти ибтидоии касбии Тоҷикистон дар Озмуни ҷумҳуриявии «Малакаи касбӣ»  соҳиби ҷойҳои 1, 2 ва 3 гардид, хабар доданд ба АМИТ «Ховар» дар Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон.

Дар маросими ҷамъбаст ва қадрдонии ғолибони озмун, ки 27 ноябр дар шаҳри Душанбе баргузор шуд, ба ғолибони ҷойҳои 1, 2 ва 3 аз рӯи 10 номинатсия медал, Диплом ва туҳфаҳои хотиравӣ ва ба роҳбарони муассисаҳои таҳсилоти ибтидоии касбие, ки дар баргузории озмун саҳми назаррас доштанд, «Сипоснома»-и Кумита оид ба таҳсилоти ибтидоӣ ва миёнаи касбӣ тақдим гардид.

Қабл аз маросими ҷоизасупорӣ намоиши дастовардҳои муассисаҳои таҳсилоти ибтидоӣ ва миёнаи касбӣ баргузор шуда, хонандагону донишҷӯён маҳсули дасташонро дар бахши ҳунарҳои мардумӣ ва ихтироъкорӣ ба маърази тамошо гузоштанд.

Дар маросими тантанавӣ мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода, Раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ ва  Сафири Иттиҳоди Аврупо дар Ҷумҳурии Тоҷикистон Раймундас Кароблис сухан намуданд.

Таъкид гардид, ки дар шароити имрӯза вобаста ба пешравиҳои илмӣ-техникӣ азхуд намудани касбу ҳунарҳои миллию муосир шарти муҳиму зарурӣ буда, барои дар бозори меҳнати дохилӣ ва хориҷӣ рақобатпазир шудани мутахассисон ва расидан ба Ҳадафҳои рушди устувор мусоидат менамояд. Дар ин замина аз ҷониби Ҳукумати мамлакат дар пайи татбиқи сиёсати созандаи Президенти Тоҷикистон муҳтарам Эмомалӣ Раҳмон барои азхуд кардани махсусияти истифодаи техникаву технология ва касбу ҳунарҳои миллию муосир тамоми шароит муҳайё гардида, заминаи ҳуқуқӣ фароҳам оварда шудааст.

Имрӯз дар назди Кумита оид ба таҳсилоти ибтидоӣ ва миёнаи касбӣ 63 муассисаи таҳсилоти ибтидоии касбӣ ва 88 муассисаи таҳсилоти миёнаи касбӣ ва 5 филиал фаъолият менамоянд, ки дар онҳо аз рӯйи зиёда аз 500 ихтисос мутахассисон омода мешаванд.

Дар замони муосир, новобаста аз шакл ва намуди идоракунии давлат маҳз омӯхтани донишҳои замонавӣ, азхуд намудани касбу ҳунар, рӯ овардан ба илм ва тарбияи кадрҳо метавонад ба рушди соҳаҳои мухталиф замина гузошта, ба болоравии иқтисоди миллӣ мусоидат намояд. Вобаста ба ин Пешвои миллат муҳтарам Эмомалӣ Раҳмон борҳо таъкид намудаанд, ки аз ҳама имконият истифода карда, ҷавононро ба илму омӯзиш ҳидоят намуда, зиндагии босаодати сокинонро бояд таъмин кард.

Дар чорабинӣ барномаи ҷолиби фарҳангии иборат аз рақсу таронаҳои миллию ватандӯстӣ манзури бинандагон гардонида шуд.

Ёдовар мешавем, ки бо ташаббуси Кумита оид ба таҳсилоти ибтидоӣ ва миёнаи касбӣ бо мақсади инкишофи шавқу завқи хонандагон, дар амал истифода намудани донишҳои назариявӣ, тақвияти кӯшиши онҳо ба корҳои эҷодӣ, тарғиби интихоби касб, фароҳам овардани шароити муносиб барои дарёфти хонандагони лаёқатманд, тақвияти тафаккури техникии онҳо ва рушди малакаи касбӣ байни хонандагони муассисаҳои таҳсилоти ибтидоии касбӣ аз рӯи 10 номинатсия Озмуни ҷумҳуриявии «Малакаи касбӣ» гузаронида шуд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон

Ноябрь 28, 2024 17:02

Хабарҳои дигари ин бахш

Имрӯз дар ноҳияҳои алоҳидаи Тоҷикистон борони кӯтоҳмуддат меборад
«ПАРАСТУ». Дар Бӯстон басти аввали истироҳатгоҳи шаҳрӣ оғоз гардид
Дар ноҳияи Ховалинг дар зиёда аз 600 гектар кишти картошка гузаронида мешавад
Имрӯз дар водиҳои Тоҷикистон ҳаво то 38 дараҷа гарм мешавад
Дар Донишгоҳи байналмилалии сайёҳӣ ва соҳибкории Тоҷикистон бахшида ба Даҳсолаи байналмилалии амал оид ба илмҳои яхшиносӣ ҳамоиш баргузор мешавад
Тавсия: барои алоқа дар Узбекистон маблағ камтар сарф мекунем
Дар соҳили Сирдарё барои истироҳату фароғат шароити хуб фароҳам оварда шудааст
Президенти Тоҷикистон ҳамоиши сатҳи олӣ — муаррифии Даҳсолаи байналмилалии барои илмҳои яхшиносӣ (криосферӣ)-ро ифтитоҳ намуданд
Дар Хуҷанд Мусобиқаи ҷумҳуриявӣ оид ба ҷудо байни наврасон ҷамъбаст гардид
Имрӯз дар шаҳри Душанбе ҳаво то 35 дараҷа гарм мешавад
ҚУРБИ АСЪОР: дар Тоҷикистон 1 рубли русӣ аз 0.1247 то 0.1240 сомонӣ муқаррар шудааст
Кишоварзони ноҳияи Восеъ дар гармхона бо усулҳои муосир маҳсулот парвариш мекунанд