Дар Суғд Рӯзи кормандони милитсияро таҷлил намуданд

ДУШАНБЕ, 08.11.2024. /АМИТ «Ховар»/. 7 ноябр дар вилояти Суғд бахшида ба Рӯзи кормандони милитсия ҷаласаи тантанавӣ баргузор гардид. Дар ин хусус ба АМИТ «Ховар» дар хадамоти матбуоти Раиси вилояти Суғд иттилоъ доданд.

Иброз гардид, ки дар ҳама давру замон пешрафти ҳаёти давлат ва ҷомеа аз суботу амният ва таъмини оромиву тартиботи ҷамъиятӣ вобастагии калон дорад. Иҷрои ин вазифаи муҳим ба зиммаи кормандони мақомоти ҳифзи ҳуқуқ ва сохторҳои низомӣ, алалхусус мақомоти корҳои дохилӣ вогузор шудааст.

Таъкид гардид, ки кормандони мақомоти милитсия аз рӯзҳои аввали фаъолият то имрӯз якҷо бо сохторҳои низомӣ барои таъмини суботу оромӣ, ҳифзи тартиботи ҷамъиятӣ, волоияти қонун, мубориза бо ҷинояткорӣ ва пешгирӣ кардани ҳама гуна қонунвайронкуниҳо содиқона ва ҷавонмардона хизмат менамоянд.

Мақомоти корҳои дохилӣ давоми 33 соли соҳибистиқлолӣ ба хотири ҳимояи дастовардҳои даврони истиқлол, ҳифзи шараф, таъмини зиндагии ороми сокинони мамлакат ва обрӯи халқу давлат дар сафи пеши мубориза қарор доранд. Дар ин роҳ садҳо нафар кормандони мақомоти корҳои дохилӣ ҷонашонро қурбон кардаанд ва мардуми Тоҷикистон хотираи неки онҳоро ҳамеша пос медорад.

Кормандони далеру шуҷои милитсия дар шароити тезу тунд шудани вазъияти сиёсиву иҷтимоӣ дар мамлакат ҳимояи Ватан ва халқу миллатро аз ҳама арзишҳо волотар дониста, барои таъмини ояндаи дурахшони давлат ва зиндагии орому осудаи мардум талоши зиёд ба харҷ доданд.

Маҳз бо фидокорӣ ва ҷоннисориҳои фарзандони бонангу номуси Ватан даҳҳо гурӯҳҳои муташаккили ҷиноӣ ва дастаҳои мусаллаҳи ғайриқонунӣ, инчунин садҳо нафар ҷинояткорони хавфнок боздошт ва ба ҷавобгарӣ кашида шуданд.

«Бо дастгирии Ҳукумати мамлакат ва мақомоти иҷроияи ҳокимияти давлатии вилоят давоми солҳои Истиқлоли давлатӣ таҳкурсии моддиву техникии мақомоти корҳои дохилӣ ва ҳама сохторҳои он барои дар сатҳи баланди касбӣ иҷро гардидани супоришҳои хизматӣ бо таҷҳизоту воситаҳои муосири техникӣ, иншооти замонавӣ ва мутахассисони касбӣ мунтазам таҳким бахшида мешавад»,-иброз шуд дар ҳамоиш.

Ҳамасола таҷлил гардидани Рӯзи кормандони милитсия нишони таваҷҷуҳи пайвастаи давлату Ҳукумати мамлакат нисбат ба ин ниҳоди муҳимми давлатӣ буда, ҳар кормандро водор месозад, ки барои таъмини иҷрои вазифаи хизматӣ ва содиқ будан ба савганди худ масъулияти дучанд эҳсос намуда, ба халқу Ватан софдилона хизмат намояд.

АКС: Хадамоти матбуоти Раиси вилояти Суғд