САВГАНДИ ҲАРБӢ. Дар қисмҳои ҳарбии Кумитаи ҳолатҳои фавқулода ва мудофиаи гражданӣ маросими қасамёдкунӣ доир шуд

ДУШАНБЕ, 15.11.2024. /АМИТ «Ховар»/. Имрӯз, 15 ноябр дар майдони «Ғалаба»-и ноҳияи Рӯдакӣ беш аз 100 сарбози қисмҳои ҳарбии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Савганди ҳарбӣ ёд намуданд.

Тавре мухбири АМИТ «Ховар» хабар медиҳад, дар маросими савгандёдкунии наваскарон иброз гардид, ки 90 фоизи ҳайати қисмҳои ҳарбии Кумитаи ҳолатҳои фавқулода ва мудофиаи гражданиро ҷавононе ташкил медиҳанд, ки донишгоҳро хатм намуда, дар сафи Кувваҳои мусаллаҳи Ҷумҳурии Тоҷикистон хизмат кардаанд ва барои идомаи фаъолият ба ин кумита муроҷиат намудаанд.

Аскарон давоми беш аз як моҳи хизмати аскарӣ меъёрҳои оинномавӣ ва дигар уҳдадориҳои ҳарбиро аз худ карда, барои ёд намудани Савганди ҳарбӣ омода шуданд. Аскарон Савганди ҳарбӣ ёд мекунанд ва ҳамчун сарбозони комилҳуқуқи Артиши миллӣ тамоми вазифаву уҳдадориҳои ҳарбиву хизматиро мустақилона иҷро менамоянд, зеро то аскар Савганди ҳарбӣ ёд накунад, наметавонад уҳдадориҳои ҳарбиро иҷро кунад.

Иброз шуд, ки қисмҳои ҳарбии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аъзои  ҷудонашавандаи Қувваҳои мусаллаҳи Ҷумҳурии Тоҷикистон буда, вазифаи асосии онҳо бурдани корҳои бартарафсозӣ ҳангоми рух додани офатҳои табиӣ мебошад.

Сокини ноҳияи Кушониён Муҳаммад Фатҳуллозода, ки фарзандаш Фазлиддин Фатҳуллозодаро ба таври ихтиёрӣ ба сафи Қувваҳои Мусаллаҳи Тоҷикистон равон намудааст, дар суҳбат ба мо иброз дошт, ки фарзанди ӯ пас аз хатми донишгоҳ ба хизмат ҷалб гардида, имрӯзҳо қарзи фарзандии худро дар назди Ватан иҷро менамояд.

«Ман мехоҳам, ки ҳама ҷавонон дар сафи Қувваҳои мусаллаҳи Ҷумҳурии Тоҷикистон содиқона хизмат намуда, сарбаландона ба назди падару модар ва наздикон баргарданд»,- гуфт Фазлиддин Фатҳуллозода.

Сокини ноҳияи Рӯдакӣ, собиқадори соҳаи маориф Эгамбердӣ Камонбердиев, ки дар савгандёдкунии яке аз набераҳояш иштирок дошт,  иброз намуд, ки ҳар ҷавон бояд ҳимояи марзу буми Ватанро орзу намояд, зеро бо ҳифзи он миллионҳо нафар одамон орому осуда зиндагӣ менамоянд.

«Дар раванди авҷ гирифтани хатарҳои глобалӣ, густариши ҷинояткории фаромиллӣ ҷавононро мебояд дар таҳкими ваҳдату ягонагӣ ва суботу оромии Тоҷикистон ҳамеша қадамҳои устувор гузошта, савганди садоқати ба Ватан ёд намудаи худро гиромӣ доранд. Савганди ҳарбӣ ҳар сарбозро водор мекунад, ки давоми хизмати ҳарбӣ бо номуси фарзандӣ ва ғурури ҷавонмардона вазифаи конститутсиониашро сарбаландона адо намояд»,- баён дошт собиқадори соҳаи маориф.

Сарбоз Шарифҷон Зиёев иброз дошт, ки «мо, сарбозон бояд шукрона аз он намоем, ки дар чунин ватани соҳибистиқлол зиндагӣ мекунем. Ҳамаи ин саодату шарофат аз баракати Истиқлолияти давлатӣ ва ғамхориҳои Президенти Ҷумҳурии Тоҷикистон муҳтарам Эмомалӣ Раҳмон ба даст омадаанд. Мо, сарбозони мамлакат бояд Ватани худро ҳифз ва ҳимоя намоем, зеро онро ба ҷуз мо ҳеҷ кас ҳимоя ва ҳифз намекунад».

Пардару модарон ва наваскарон хизмат дар сафи Қувваҳои Мусаллаҳи мамлакатро муҳимтарин мактаб дар ҳаёти ҷавонон ва дарси садоқату вафодорӣ арзёбӣ намуданд. Чун самти асосии таъйиноти ин воҳиди низомӣ пеш бурдани амалиёти муҳиму масъулиятнок аст, аз ин лиҳоз ҳайати шахсии он ҳамеша пайи такмили донишу таҷриба ва малакаи касбӣ мебошад.

Дар охири ҷамъомад гузашти низомии афсарону сарбозон, аз ҷумла наваскарон, ки дар ин мактаби мардонагӣ таълиму таҷрибаи ҳарбӣ мегиранд, баргузор шуд.

Моҳинави НАВРӮЗ,
АМИТ «Ховар»

АКС: АМИТ «Ховар»