Занону духтарон дар Корхонаи воҳиди давлатии «Роҳи оҳани Тоҷикистон» Конститутсияро меомӯзанду гиромӣ медоранд

ДУШАНБЕ, 04.11.2024 /АМИТ «Ховар»/. Бахшида ба 30-солагии Конститутсияи Ҷумҳурии Тоҷикистон ва Соли маърифати ҳуқуқӣ дар Корхонаи воҳиди давлатии «Роҳи оҳани Тоҷикистон» дар байни занону духтарони корхона озмуни анъанаҳои миллӣ ва васфи Конститутсия гузаронида шуда, ҷамъбаст гардид.

Таъкид гардид, ки давоми таърихи беш аз ҳазорсола миллати тоҷик дар баробари дигар арзишҳо ва муқаддасоти миллӣ дорои фарҳанг, забон, расму оин ва арзишҳои миллӣ буд, ки маҳз тавассути онҳо миллат шинохта мешавад. Дар заминаи андешаҳои таърихӣ метавон гуфт, ки тоҷикон аз азал дорои тамаддун ва фарҳанги бою ғанӣ буда, маҳз тавассути он пойдории хешро давоми қарнҳо тақвият бахшидаанд. Зеро тавассути фарҳанги миллӣ симои ҳар миллат мавриди тасвир қарор мегирад. Либоси миллӣ муаррифи миллати тоҷик дониста мешавад, ки нахустин нишонаҳои онро ҳанӯз метавон аз бозёфтҳои таърихӣ, нақшу нигораҳои рӯи санг ва тасвирҳо дар деворҳо пайдо намуд.

Дар идома тазаккур дод шуд, ки Конститутсия барои таъсис ва рушди низоми ҳуқуқии мамлакат, сохтору мақомоти давлатӣ ва дар меҳвари фаъолияти онҳо қарор додани инсон ва ҳуқуқу озодиҳои ӯ, манфиатҳои давлат ва шаҳрвандон, инчунин бунёди ҷомеаи адолатпарвар асос гузошта, кафолати таъмини озодӣ, адолати иҷтимоӣ ва баробарҳуқуқии ҷомеаи навини Тоҷикистон гардид. Инчунин таъкид шуд, ки Конститутсияи Ҷумҳурии Тоҷикистон заминагузори низоми нави давлатдории миллӣ, таҳкимбахши нақш ва мақоми ҳокимияти давлатӣ дар ҷомеаи имрӯзаи мамлакат ва арсаи байналмилалӣ, инчунин таъмини ҳуқуқу озодиҳои инсон ва шаҳрванд, волоияти қонун ва адолати судиву иҷтимоӣ мебошад.

Занону духтарони корхона доир ба анъанаҳои миллии тоҷикон, фарҳангу либоси миллӣ, Конститутсия ва муқарароти он байни ҳам рақобат намуда, беҳтаринҳо сазовори ҷойҳои ифтихорӣ гардиданд.

АКС: Корхонаи воҳиди давлатии «Роҳи оҳани Тоҷикистон»