Агентии обуҳавошиносии Тоҷикистон сабаби ба амал омадани тумани рӯзҳои охирро шарҳ дод

ДУШАНБЕ, 25.12.2024. /АМИТ «Ховар»/. Чанд рӯз аст, ки ҳаво дар Ҷумҳурии Тоҷикистон тағйирёбандаи бебориш шуда, туман ба амал меояд. Дар робита ба ин Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» иттилоъ дод, ки яке аз сабабҳои пайдоиши анбӯҳи туман намнокии баланди ҳаво мебошад.

Тавре иттилоъ дода шуд, ҳоло дар кӯчаҳо анбӯҳи туман фаромада, дурии биниш дар қисматҳои гуногуни шаҳри Душанбе аз 5 то 20 метрро ташкил медиҳад.

Яке аз сабабҳои пайдоиши туман намнокии баланди ҳаво аст. Вақте ки ҳаво миқдори зиёди буғи обро дар бар мегирад, дар доираи ҳодисаи конденсатсия он метавонад дар шакли туман ё қирав ҳангоми паст шудани ҳарорат ба вуқуъ пайвандад.

Ба иттилои Агентии обуҳавошиносӣ, сабаби дигари туман инверсияи ҳароратӣ мебошад. Ин ҳолате аст, ки дар он қабати ҳавои гарм дар зери қабати ҳавои хунук қарор мегирад. Дар чунин шароит ҷараёни болоравии ҳаво бо намнокӣ наметавонад қабати хунукро убур кунад ва ба боло барояд, ки ин боиси пайдоиши туман мегардад.

Норасоии шамол низ метавонад сабаби ба амал омадани туман гардад. Шамол метавонад туманро суръат бахшад ва онро бардорад. Дар сурати набудани шамол туман метавонад ҷамъ ва зичтар шавад.

Бояд гуфт, ки туман ва қирав барои ҳаракати нақлиёт хатарнок арзёбӣ мегардад. Ин зуҳурот барои одамон, бахусус онҳое, ки аз бемориҳои роҳи нафас азият мекашанд, сабаби нороҳатӣ мегардад.

АКС: Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон