Дар ноҳияи Шаҳринав вобаста ба интихоботи вакилони халқ машварати омӯзишӣ доир гардид

ДУШАНБЕ, 14.12.2024 /АМИТ «Ховар»/. 11 декабр дар Мақомоти иҷроияи ҳокимияти давлатии ноҳияи Шаҳринав аз ҷониби Комиссияи марказии интихобот ва раъйпурсии Ҷумҳурии Тоҷикистон бо иштироки аъзои эҳтимолии участкаҳои интихоботӣ ва аҳолии ноҳия машварати омӯзишӣ баргузор шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Шаҳринав хабар медиҳад, намояндагони  Комиссияи марказии интихобот ва раъйпурсӣ доир ба омодагии интихоботи вакилони Маҷлиси намояндагони Маҷлиси Олии Ҷумҳурии Тоҷикистон, маҷлисҳои вакилони халқи ноҳия ва ҷамоатҳои деҳот, тартиби ташкили участкаҳои интихоботӣ ва комиссияҳои участкавии интихоботӣ, доир ба фаъолияти комиссияҳои поёнии интихоботӣ, тартиб додани рӯйхати интихобкунандагон дар участкаҳои интихоботӣ ва барои шиносоии умумӣ пешниҳод намудани рӯйхатҳо ва таъминоти моддию техникии комиссияҳои ҳавзавӣ ва участкавӣ маъруза намуданд.

Таъкид шуд, ки ҳайатҳои комиссияҳои ҳавзавӣ ва участкавӣ бояд аз ҳисоби кормандони соҳаҳои маориф, тандурустӣ, фарҳанг, ташкилоти ғайридавлатӣ ва собиқадорон интихоб шаванд, то ба фаъолияти беғаразонаи онҳо шубҳа карда нашавад.

Ҳамчунин диққати иштирокдорони машварат ба масъалаҳои таҳия ва тасдиқи нақшаҳои кори комиссияҳои ҳавзавӣ ва участкавӣ, тайёр намудани шиору овезаҳо доир ба интихобот, баргузории ҷаласаҳои комиссияҳои поёнии интихоботӣ ва сари вақт баррасӣ намудани масъалаҳои ба онҳо дахлдор ҷалб карда шуд.

Иштирокдорон вобаста ба амалисозии чорабиниҳои дар нақшаи тақвимӣ муайянгардида фикру андешаҳои судманд баён намуданд.

АКС: Мақомоти иҷроияи ҳокимияти давлатии ноҳияи Шаҳринав