Дастаҳои футболи «Истиқлол»-и Тоҷикистон ва «Сипоҳон»-и Эрон бо ҳам бозӣ карданд

ДУШАНБЕ, 04.12.2024. /АМИТ «Ховар»/. Шоми 3 декабр дар Варзишгоҳи марказии шаҳри Душанбе дастаҳои футболи «Истиқлол»-и Тоҷикистон ва «Сипоҳон»-и Эрон дар доираи бозиҳои даври 6-уми марҳилаи гурӯҳии Лигаи чемпионҳои 2-и Осиё бо ҳам рақобат карданд. Вохӯрии дастаҳо бо ҳисоби 0 бар 2 ба фоидаи дастаи футболи «Сипоҳон»-и Эрон анҷом ёфт. Дар ин хусус шореҳи варзиши АМИТ «Ховар» хабар медиҳад.

Аз ҳайати дастаи футболи «Сипоҳон»-и Эрон голҳоро Муҳаммад Каримӣ аз пеналтӣ дар дақиқаи 55-ум ва Абубакар Камара дар дақиқаи 80-ум ба нишон расониданд.

Бозии дигари гурӯҳ байни дастаҳои футболи «Ал-Ваҳдат»-и Урдун ва «Ал-Шарҷа»-и АМА бо ҳисоби 1 бар 3 ба фоидаи дастаи «Ал-Шарҷа»-и АМА анҷом ёфт.

Дастаи футболи «Истиқлол»-и Тоҷикистон дар гурӯҳи «С» пас аз шаш давр дар зинаи охир ҷой гирифт.

Хотиррасон мешавем, ки дар ин гурӯҳ дастаи футболи «Ал-Шарҷа»-и АМА бо 13 имтиёз пешгом буда, ҳамроҳ бо дастаи «Ал-Ваҳдат»-и Урдун, ки бо 11 имтиёз дар зинаи дуюм аст, ба даври плей-офф роҳ ёфтанд. Дастаи футболи «Сипоҳон»-и Эрон бо 10 имтиёз дар зинаи сеюм мавқеъ гирифта, ба даври баъдӣ баромада натавонист.

АКС: Варзиш ТВ