ИНТИХОБОТИ ВАКИЛОНИ ҲАЛҚ-2025. Дар Тоҷикистон панҷ ҳавзаи интихоботии бисёрмандатӣ ва дар 28 давлати ҷаҳон 36 участкаи интихоботӣ таъсис дода шуд

ДУШАНБЕ, 27.12.2024 /АМИТ «Ховар»/. Тибқи қарори Комиссияи марказии интихобот ва раъйпурсии Ҷумҳурии Тоҷикистон (КМИР) дар ҳудуди мамлакат панҷ ҳавзаи интихоботии бисёрмандатӣ таъсис дода шуд. Ҳамчунин бо мақсади таъмини ҳуқуқи интихоботии шаҳрвандони Ҷумҳурии Тоҷикистон дар хориҷи мамлакат, дар назди сафоратхонаҳо, консулгариҳо ва намояндагии Тоҷикистон дар 28 давлати ҷаҳон 36 участкаи интихоботӣ таъсис дода шуд. Дар ин хусус зимни ҷаласаи навбатии Комиссияи марказии интихобот ва раъйпурсии Ҷумҳурии Тоҷикистон, ки имрӯз дар шаҳри Душанбе таҳти роҳбарии Раиси ин Комиссия Бахтиёр Худоёрзода доир гардид, иттилоъ дода шуд.

Тавре ба АМИТ «Ховар» дар Комиссияи марказии интихобот ва раъйпурсии Ҷумҳурии Тоҷикистон хабар доданд, дар ҷаласа нахуст масъалаи ташкили ҳавзаҳои интихоботии бисёрмандатӣ оид ба интихоботи аъзои Маҷлиси миллии Маҷлиси Олии Ҷумҳурии Тоҷикистон баррасӣ гардид.

Ҳамчунин бо мақсади ташкили ҳамкории судманди мақомоти милитсия ва комиссияҳои интихоботӣ дар раванди интихобот Роҳнамо барои кормандони милитсия қабул карда шуд.

Барои танзими фаъолияти мушоҳидони байналмилалӣ, ки бо мақсади мушоҳидаи раванди интихобот ба ҷумҳурӣ меоянд ва таъмини шароити мусоиди фаъолият барои онҳо гурӯҳи кории Комиссияи марказӣ таъсис дода шуд, ки ба он намояндагони як зумра вазорату идораҳо шомил гаштанд.

Дар ҷаласа аъзои Комиссияи марказӣ инчунин масъалаҳои дигари ташкилиро баррасӣ ва муҳокима намуда, оид ба ҳар яки онҳо қарори дахлдор қабул намуданд.

Корҳои омодагӣ барои дар сатҳи баланди ташкилию сиёсӣ баргузор намудани интихоботи даъвати нави вакилони Маҷлиси намояндагони Маҷлиси Олии Ҷумҳурии Тоҷикистон ва Маҷлисҳои маҳаллии вакилони халқ идома доранд.

АКС: АМИТ «Ховар»