Масъалаҳои умдаи риёзиёт дар осори Абурайҳони Берунӣ, Абуалӣ ибни Сино ва Умари Хайём дар конфронси байналмилалӣ баррасӣ гардид

ДУШАНБЕ, 27.12.2024 /АМИТ «Ховар»/. Масъалаҳои умдаи риёзиёт дар осори Абурайҳони Берунӣ, Абуалӣ ибни Сино ва Умари Хайём дар конфронси илмию амалии байналмилалӣ, ки дар Донишгоҳи байналмилалии сайёҳӣ ва соҳибкории Тоҷикистон баргузор гардид, баррасӣ шуданд.

АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон иттилоъ медиҳад, ки конфронси байналмилалӣ дар доираи амалисозии Нақшаи чорабиниҳои «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» баргузор гардид.

Ректори Донишгоҳи байналмилалии сайёҳӣ ва соҳибкории Тоҷикистон Убайдулло Асрорзода вобаста ба муҳиммияти конфронс ибрози назар намуда, таъкид дошт, ки конфронс на танҳо платформа барои муҳокима ва таҳқиқи амиқи мероси бузурги ин абармардони илму фарҳанг аст, балки фурсати нодир барои муттаҳид кардани олимон ва муҳаққиқони соҳаҳои гуногун аз давлатҳои ҷаҳон мебошад.

Мероси илмии халқи тоҷик, ки тавассути бузургони илму фарҳанг ба ҷаҳониён муаррифӣ шудааст, барои башарият манбаи илҳом ва роҳнамоӣ аст. Дар радифи ин се нобиғаи беҳамто – Абурайҳони Берунӣ, Абуалӣ ибни Сино ва Умари Хайём ҳамчун сутунҳои устувори илми риёзӣ ва фалсафа дар таърихи инсоният нақши бузург доранд.

Президенти Ҷумҳурии Тоҷикистон муҳтарам Эмомалӣ Раҳмон дар паёмҳо, суханрониҳо ва китобҳояшон ба масъалаҳои илму фарҳанг ва саҳми бузурги донишмандони барҷастаи тоҷик, аз ҷумла Абурайҳони Берунӣ, Абӯалӣ ибни Сино ва Умари Хайём ҳамеша таваҷҷуҳи хосса зоҳир менамоянд.

Пешвои миллат зарурати омӯзиши осори ин донишмандонро барои дарёфти роҳҳои ҳалли масоили иқтисодии имрӯза, аз ҷумла идоракунии захираҳои табиӣ, рушди илм ва истеҳсолот, таъмини адолати иҷтимоӣ ва ҳифзи муҳити зист борҳо таъкид намудаанд. Мероси илмии ин олимон метавонад ба рушди сиёсати иқтисодии кишварҳо, хусусан дар доираи принсипҳои одилонаи истифодаи захираҳ, кумак расонад.

Осори Абурайҳони Берунӣ, Абӯалӣ ибни Сино ва Умари Хайём назари васеъ ба масъалаҳои иҷтимоӣ ва иқтисодии давронро дар бар мегиранд. Ин се шахсият бо мулоҳизаҳои амиқи худ дар соҳаҳои илм, фалсафа ва иҷтимоиёт тавонистанд андешаҳои тозаеро дар бораи пешрафти ҷомеа ва иқтисод пешниҳод кунанд.

Ҳамасола бо ташаббуси раёсати Донишгоҳи байналмилалии сайёҳӣ ва соҳибкории Тоҷикистон дар доираи эълон гардидани солҳои 2020-2040 «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» силсилаконфронсҳои байналмиллаӣ гузаронида мешаванд.

Аз ҷониби дигар Донишгоҳи байналмилалии сайёҳӣ ва соҳибкории Тоҷикистон ҳамчун муассисаи пешсафи таълимӣ ва илмӣ ҳамеша барои пешбурди илм, таҳқиқот ва рушди ҳамкории байналмилалӣ талош менамояд. Баргузории конфронси байналмилалӣ ба густариши омӯзиши мероси илмии гузаштагон ва татбиқи он дар шароити кунунӣ мусоидат мусоидат менамояд.

Дар конфронси байналмилалӣ олимону донишмандони шинохтаи тоҷик доир ба мавзуи баррасишаванда ва осори гаронарзиши се нобиғаи ҷаҳонӣ- Абурайҳони Берунӣ, Абӯалӣ ибни Сино ва Умари Хайём сухан намуданд.

АКС: Донишгоҳи байналмилалии сайёҳӣ ва соҳибкории Тоҷикистон