Муовини Сарвазири Тоҷикистон бо ҷараёни зимистонгузаронӣ дар муассисаҳои маорифи ноҳияи Спитамен шинос шуд

ДУШАНБЕ, 10.12.2024. /АМИТ «Ховар»/. Муовини Сарвазири Ҷумҳурии Тоҷикистон Дилрабо Мансурӣ бо ҷараёни зимистонгузаронӣ дар якчанд муассисаи маорифи ноҳияи Спитамен шинос шуд. Дар ин хусус АМИТ «Ховар» бо истинод ба Раёсати маорифи вилояти Суғд хабар медиҳад.

Аз ҷумла, бо ҷараёни фаъолият ва зимистонгузаронӣ дар Муассисаи таҳсилоти миёнаи умумии №9, ҷараёни сохтмони китобхонаи ин деҳа, ва муассисаи томактабии №14 шинос гардид.

Иттилоъ дода шуд, ки дар муассисаҳои таҳсилоти миёнаи умумии ноҳия, ки шумораи онҳо ба 33 адад мерасад, зимистонгузаронӣ дар ҳолати хуб буда, тибқи маълумоти пешниҳодшуда, дар якчанд  мактаб ангишт захира карда шудааст. Инчунин дар муассисаҳои калонтарин таҷҳизоти зарурии гармидиҳӣ насб гардидаанд. Аз ҷумла, дар Муассисаи таҳсилоти миёнаи умумии №9 зиёда аз 24 тонна ангишт захира шудааст.

Иттилоъ дода шуд, ки дар муассисаҳои таълимии ноҳия 32 780 хонанда ба таҳсил фаро гирифта шуда, ба онҳо зиёда аз 2 ҳазор омӯзгор таълим медиҳад.

АКС: Раёсати маорифи вилояти Суғд