Вобаста ба хатари терроризм ба низоми давлатдории муосир дар Вазорати мудофиаи Тоҷикистон ҳамоиш доир шуд

ДУШАНБЕ, 31.12.2024 /АМИТ «Ховар»/. Дар Донишкадаи ҳарбии Вазорати мудофиаи Ҷумҳурии Тоҷикистон дар мавзуи «Хавфу хатари терроризм ба низоми давлатдории муосир» ҳамоиш доир гардид, ки ҳадаф аз он боло бурдани сатҳи маърифатнокии афсарони ҷавон, курсантон, тарбияи кадрҳои баландихтисос ва баланд бардоштани сатҳи зиндагии низомиён арзёбӣ гардид. Дар ин хусус ба АМИТ «Ховар» дар Вазорати мудофиаи Тоҷикистон хабар доданд.

Иброз гардид, ки дар даврони Истиқлолияти давлатӣ бо таҳкими сулҳу оромӣ ва беҳдошти вазъи сиёсӣ-иқтисодӣ дар мамлакат таҳти сарварии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон иқдоми бузурги бунёдкорию созандагӣ, рушди илму маориф, дастгирии ҷавонон, баланд бардоштани иқтидори мудофиавии мамлакат ва таъмини пешравиҳои назаррас дар ҳама самту соҳаҳо ба вуқуъ пайваст.

Имрӯз терроризм ва экстремизм на танҳо ба давлати алоҳида, балки ба тамоми мамлакатҳои ҷаҳон, новобаста аз дараҷаи тараққиёти онҳо таҳдид мекунанд. Бинобар ин, тамоми кишварҳои ҷаҳонро зарур аст, ки дар самти мубориза бо терроризм ва экстремизм, ҳимояи ҳуқуқу озодиҳои инсон ва шаҳрванд, сулҳу субот, ягонагӣ ва амният, пешгирии сокинони сайёра ва безараргардонии экстремистону террористон тадбирҳои қатъӣ андешида, қонунгузориро бобати мубориза бо ин зуҳуроти даҳшатовару нафратовар пурзӯр намоянд.

Таъкид гардид, ки афсарону сарбозони шуҷои Ватанро мебояд, ки барои мубориза бо хатарҳои эҳтимолӣ ҳамеша дар ҳолати омодабош қарор дошта бошанд. Ҳамзамон дар шароити мураккабу печидаи ҷаҳони муосир хизматчиёни ҳарбии Қувваҳои мусаллаҳ ва кормандони мақомоти ҳифзи ҳуқуқ вазифадор ҳастанд, ки барои ҳимояи марзу буми давлати соҳибистиқлоламон, ҳифзи суботи сиёсӣ ва қонунияту тартиботи ҳуқуқӣ ҳамеша омода бошанд.

АКС: Вазорати мудофиаи Ҷумҳурии Тоҷикистон