Ҳамкорӣ дар соҳаи технологияҳои иттилоотию коммуникатсионӣ байни Тоҷикистону Эрон густариш меёбад

ДУШАНБЕ, 18.01.2025 /АМИТ «Ховар»/. Тавре қаблан иттилоъ додем, 16 январ Ёддошти тафоҳум дар бораи ҳамкорӣ дар соҳаи технологияҳои иттилоотию коммуникатсионӣ байни Хадамоти алоқаи назди Ҳукумати Ҷумҳурии Тоҷикистон ва Вазорати технологияҳои иттилоотию коммуникатсионии Ҷумҳурии Исломии Эрон табодул карда шуд.

Ёддошти тафоҳумро сардори Хадамоти алоқаи назди Ҳукумати Ҷумҳурии Тоҷикистон Бег Сабур ва Вазири неруи Ҷумҳурии Исломии Эрон Аббос Алиободӣ табодул намуданд.

Тавре ба АМИТ «Ховар» дар Хадамоти алоқа хабар доданд, Ёддошти тафоҳум заминаи васеъ ва мусоиди ҳамкориро дар бахши технологияҳои иттилоотию коммуникатсионӣ ба вуҷуд оварда, ба  густариш ва рушди муносибатҳои байнидавлатӣ мусоидат мекунад.

Дар доираи муқаррароти Ёддошти тафоҳум ҳамкории самарабахш дар самтҳои гуногуни  татбиқ ва манфиат аз  технологияҳои иттилоотию коммуникатсионӣ ва табодули таҷрибаҳои муваффақ  дар назар гирифта шудааст.

АКС: Хадамоти матбуоти Президенти Ҷумҳурии Тоҷикистон