Анҷумани XXXVII ғайринавбатии Ҳизби коммунистии Тоҷикистон баргузор шуд

ДУШАНБЕ, 04.01.2025 /АМИТ «Ховар»/. 4 январ дар шаҳри Душанбе Анҷумани XXXVII ғайринавбатии Ҳизби коммунистии Тоҷикистон баргузор гардид. Дар ин хусус ба АМИТ «Ховар» дар Ҳизби коммунистии Тоҷикистон баргузор гардид хабар доданд.

Дар кори анҷуман вакилон аз кумитаҳои вилоятӣ, минтақавӣ, шаҳрӣ ва ноҳиявии ҳизб иштирок намуданд.

Дар анҷуман, аз ҷумла масъалаҳои вобаста ба иштироки Ҳизби коммунистии Тоҷикистон дар интихоби навбатии Маҷлиси намояндагони Маҷлиси Олии Ҷумҳурии Тоҷикистон, барномаи пешазинтихоботӣ, пешбарии номзадҳо ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи ҷумҳуриявӣ ва ташкили ситоди интихоботии ҳизб баррасӣ гардид.

Аз рӯйи масъалаҳои рӯзномаи кори анҷуман котиби дуюми Кумитаи марказии Ҳизби коммунистии Тоҷикистон Зарагул Мирасанова суханронӣ намуд.

Вакилони анҷуман баъди баррасии масъалаи пешбарии номзадҳо ба вакилӣ дар интихоботи Маҷлиси намояндагони Маҷлиси Олии Ҷумҳурии Тоҷикистон номзадии 6 аъзои фаъоли ҳизб, аз ҷумла раиси Ҳизби коммунистии Тоҷикистон Меҳроҷ Абдуллоев, котиби дуюми Кумитаи Ҳизби коммунистии Тоҷикистон дар вилояти Суғд Инъомҷон Подшоев, котиби дуюми Кумитаи марказии Ҳизби коммунистии Тоҷикистон Зарагул Мирасанова, котиби якуми Кумитаи Ҳизби коммунистии Тоҷикистон дар шаҳри Душанбе Отахон Ҳасанов, вакили Маҷлиси намояндагони Маҷлиси Олии Ҷумҳурии Тоҷикистон Абдуҷаббор Умарзода ва котиби якуми Кумитаи Ҳизби коммунистии Тоҷикистон дар минтақаи Кӯлоб Ҳикматулло Ҳамидовро ба вакилӣ дар интихоботи Маҷлиси намояндагони Маҷлиси Олии Ҷумҳурии Тоҷикистон пешниҳод намуданд.