Аз ҳавзаи якмандатии интихоботии Ҷайҳун №33 номзад ба вакилии Маҷлиси намояндагони Маҷлиси Олӣ пешбарӣ карда шуд

ДУШАНБЕ, 08.01.2024. /АМИТ «Ховар»/. Ҷаласаи якҷояи кумитаҳои иҷроияи Ҳизби Халқии Демократии Тоҷикистон дар ноҳияҳои Ҷайҳун, Панҷ, Ҷалолиддини Балхӣ ва Дӯстӣ баргузор гардида, номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Ҷайҳун №33 пешбарӣ шуд. Дар ин хусус ба АМИТ «Ховар» аз кумитаи иҷроияи Ҳизби Халқии Демократии Тоҷикистон хабар доданд.

Дар маҷлис масъалаҳои тасдиқи нақшаи чорабиниҳо оид ба тарғибу ташвиқи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» аз 28 декабри соли 2024 ва пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Ҷайҳун  №33 баррасӣ гардиданд.

Дар анҷом бо овоздиҳии аъзои кумитаҳои иҷроияи Ҳизби Халқии Демократии Тоҷикистон дар ноҳияҳои Ҷайҳун, Панҷ, Ҷалолиддини Балхӣ ва Дӯстӣ номзадии Неъматулло Иброҳимзода ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаи якмандатии интихоботи Ҷайҳун №33 пешбарӣ гардид.

АКС: Кумитаҳои иҷроияи Ҳизби Халқии Демократии Тоҷикистон