Дар ноҳияи Нуробод доир ба маъракаи интихобот машварати омӯзишӣ доир гардид

НУРОБОД, 24.01.2025 /АМИТ «Ховар»/. Дар Муассисаи таҳсилоти миёнаи умумии №28-и шаҳраки Дарбанди ноҳияи Нуробод бо иштироки намояндагони  Комиссияи марказии интихобот ва раъйпурсӣ,  аъзои Комиссияи ҳавзавӣ, комиссияҳои участкавии интихобот оид ба интихоботи вакилони Маҷлиси намояндагон ва комиссияҳои интихоботӣ оид ба интихоботи вакилони маҷлисҳои маҳаллии вакилони халқ машварати омӯзишӣ баргузор гардид. Дар ин хусус ба мухбири минтақавии АМИТ «Ховар» Субҳониддини Маҳмуд дар Мақомоти иҷроияи ҳокимияти давлатии ноҳияи Нуробод иттилоъ доданд.

Машварати омӯзишӣ бо мақсади баланд бардоштани малакаи корбарии аъзои комиссияҳои интихоботӣ, фаҳмонидани мазмуну муҳтавои қонунҳои конститутсионӣ дар бораи интихобот, дастурамалҳои Комиссияи марказии интихобот ва раъйпурсии Ҷумҳурии Тоҷикистон, шиносоӣ бо ҷараёни омодагӣ ба ин чорабинии муҳими сиёсӣ ва фаъолияти комиссияҳои поёнии интихобот гузаронида шуд.

Дар машварат иброз гардид, ки комиссияҳои интихоботӣ бояд ваколатҳои худро дар асоси талаботи қонунгузории интихоботӣ амалӣ намуда, барои сари вақт омода намудани ҳуҷҷатҳои интихоботӣ, ба итмом расонидани маъракаи барӯйхатгирии интихобкунандагон, дастрас гардонидани хабарномаҳо дар бораи вақт ва ҷойи овоздиҳӣ, мавод оид ба тартиби иштирок дар интихобот ва тарзи нави овоздиҳӣ тадбирҳои зарурӣ андешанд.

Барои дар сатҳи баланд баргузор гардидани интихобот  гузаронидани машваратҳои омӯзишӣ ва бурдани корҳои фаҳмондадиҳӣ дар байни аъзои Комиссияи ҳавзавӣ, комиссияҳои участкавии интихобот оид ба интихоботи вакилони Маҷлиси намояндагон ва комиссияҳои интихоботӣ оид ба интихоботи вакилони маҷлисҳои маҳаллии вакилони халқи ноҳияҳои минтақаи Рашт идома дорад.

Бояд гуфт, ки дар ҳама ноҳияҳои минтақаи Рашт участкаҳои интихоботӣ омода буда, бо маводи зарурӣ ва дастурамалҳо таъмин мебошанд.

АКС: Мақомоти иҷроияи ҳокимияти давлатии ноҳияи Нуробод