ИНТИХОБОТИ ВАКИЛОНИ ХАЛҚ-2025. Дар ноҳияи Рашт барои дар сатҳи баланд гузаронидани интихобот машварати омӯзишӣ доир гардид

РАШТ, 27.01.2025 /АМИТ «Ховар»/. Дар ноҳияи Рашт оид ба интихоботи вакили Маҷлиси намояндагони Маҷлиси Олии Ҷумҳурии Тоҷикистон, комиссияҳои ҳавзавӣ ва участкавии интихоботи вакилони Маҷлиси вакилони халқи ноҳия ва комиссияҳои ҳавзавии вакилони ҷамоатҳои шаҳраку деҳот машварати омӯзишӣ доир гардид. Дар ин хусус ба хабарнигори АМИТ «Ховар» Субҳониддини Маҳмуд дар Мақомоти иҷроияи ҳокимияти давлатии ноҳияи Рашт иттилоъ доданд.

Дар машварат намояндагони Комиссияи марказии интихобот ва раъйпурсии Ҷумҳурии Тоҷикистон иштирок намуда, барои дар сатҳи баланди ташкилию сиёсӣ баргузор намудани интихоботи даъвати нави вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ ва ба тариқи озод, шаффоф ва бо риояи қонунҳои амалкунанда гузаронидани интихоботи дарпешистода сухан гуфтанд. Ҳамзамон раисони ҳавзаҳо ва учаскаҳои интихоботӣ ва дигар аъзои участкаҳои интихоботӣ ба саволҳои хеш посух гирифтанд.

Дар ноҳияи Рашт ҳама участкаҳои интихоботӣ омода буда, интихоботи дарпешистода дар сатҳи баланди сиёсӣ баргузор мегардад.

Бояд гуфт, ки имрӯзҳо дар ҷамоатҳои шаҳраку деҳоти ноҳияи Рашт барои иштироки фаъолонаи сокинон дар маъракаи интихобот ташаббусҳои тарғиботӣ доир мегарданд. Зимни онҳо ба сокинон варақаҳои иттилоотӣ доир ба интихобот тақсим карда мешаванд.

АКС: Мақомоти иҷроияи ҳокимияти давлатии ноҳияи Рашт