ИНТИХОБОТ-КАФИЛИ РУШДИ МИЛЛАТ. Дар Хуҷанд иқдоми тарғиботӣ гузаронида шуд

ДУШАНБЕ, 25.01.2025 /АМИТ «Ховар»/. Тибқи нақшаи Кумитаи иҷроияи Ҳизби Халқии Демократии Тоҷикистон дар шаҳри Хуҷанд таҳти унвони «Интихобот – кафили рушди миллат» иқдоми таблиғотӣ баргузор гардид.

Тавре ба  АМИТ «Ховар» аз Кумитаи иҷроияи Ҳизби Халқии Демократии Тоҷикистон дар шаҳри Хуҷанд хабар доданд, аъзои фаъоли Ташкилоти ҷумҳуриявии ҷавонон «Созандагони Ватан» дар маҳаллаҳои «Дӯстии халқҳо» ва «Навбаҳор»-и шаҳри Хуҷанд варақаҳои иттилоотӣ тақсим намуда, ба сокинон аҳамияти иштироки фаъолона дар интихоботи Маҷлиси Олии Ҷумҳурии Тоҷикистон ва маҷлисҳои маҳаллии вакилони халқро шарҳ доданд.

Иштирокчиён бо шиори «Интихобот – маъракаи муҳими сиёсӣ» ба сокинон фаҳмониданд, ки бо иштирок дар интихобот ҳар шаҳрванд барои ояндаи дурахшони Тоҷикистон саҳм мегузорад. Чорабиниҳо, аз ҷумла насби шиору овезаҳо дар кӯчаҳои шаҳр идома меёбанд.

Ҳизби Халқии Демократии Тоҷикистон омили рушди низоми қонунгузории ҷумҳурӣ ва ҳифзи ҳуқуқу озодиҳои шаҳрвандон гашта, дар бунёди ҷомеаи демократӣ, ҳуқуқбунёд ва дунявӣ нақши муҳим мегузорад.

АКС: Кумитаи иҷроияи Ҳизби Халқии Демократии Тоҷикистон дар шаҳри Хуҷанд