Маҷлиси Кумитаи иҷроияи Ҳизби аграрии Тоҷикистон дар шаҳри Ҳисор баргузор шуд

ДУШАНБЕ, 15.01.2025. /АМИТ «Ховар»/. Маҷлиси Кумитаи иҷроияи Ҳизби аграрии Тоҷикистон дар шаҳри Ҳисор баргузор гардид. Дар ин хусус ба АМИТ «Ховар»  дар  Кумитаи иҷроияи Ҳизби аграрии Тоҷикистон хабар доданд.

Зимни баргузории маҷлиси Кумитаи иҷроияи Ҳизби аграрии Тоҷикистон дар шаҳри Ҳисор номзади ин ҳизб ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Ҳисор, №7 пешбарӣ гардид.

Дар ҷаласа масъалаҳо доир ба шарҳу тавзеҳи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 28 декабри соли 2024, таъсиси Ситоди пешазинтихоботии Кумитаи иҷроияи Ҳизби аграрии Тоҷикистон дар шаҳри Ҳисор ва пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Ҳисор, №7 баррасӣ гардиданд.

Бо назардошти маъракаи муҳими сиёсии дарпешистода — интихоботи вакилон ба Маҷлиси намояндагони Маҷлиси Олии Ҷумҳурии Тоҷикистон Ситоди пешазинтихоботии Кумитаи иҷроияи Ҳизби аграрии Тоҷикистон дар шаҳри Ҳисор таъсис дода шуд. Инчунин аъзои ҳизб Зафар Ғафуров номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Ҳисор, №7 пешбарӣ гардид.

АКС: Кумитаи иҷроияи Ҳизби аграрии Тоҷикистон