Номзад аз Ҳизби Халқии Демократии Тоҷикистон дар ҳавзаи интихоботии якмандатии Сомонӣ, №8-и ноҳияи Рӯдакӣ пешбарӣ карда шуд

ДУШАНБЕ, 08.01.2025 /АМИТ «Ховар»/. 7 январ дар  ноҳияи Рӯдакӣ вобаста ба пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Сомонӣ, №8 ҷаласа баргузор гардид, хабар медиҳад АМИТ «Ховар».

Тибқи рӯзномаи маҷлиси Кумитаи иҷроияи Ҳизби Халқии Демократии Тоҷикистон дар ноҳияи Рӯдакӣ, дар ҷаласа масъалаҳо вобаста ба  тасдиқи Нақшаи чорабиниҳо оид ба таблиғу ташвиқи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» аз 28 декабри соли 2024, таъсиси Ситоди пешазинтихоботии Кумитаи иҷроияи Ҳизби Халқии Демократии Тоҷикистон дар ноҳияи Рӯдакӣ ва пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Сомонӣ, №8 баррасӣ гардид.

Зимни баррасии масъалаи дуюми рӯзномаи маҷлис иброз гардид, ки мутобиқи  Фармони Президенти Ҷумҳурии Тоҷикистон 2 марти соли 2025 дар ҷумҳурӣ интихоботи вакилони Маҷлиси намояндагони Маҷлиси Олии Ҷумҳурии Тоҷикистон, вакилони Маҷлиси вакилони халқ ва маҷлисҳои ҷамоатҳо баргузор мегардад.

Бо мақсади иштироки фаъолона ва дар сатҳи баланд баргузор гардидани ин маърака тибқи дастуру супоришҳои дастгоҳи Кумитаи иҷроияи марказии Ҳизби Халқии Демократии Тоҷикистон бо қабули қарори дахлдор дар ноҳия Ситоди пешазинтихоботии Кумитаи иҷроия таъсис дода шуда, роҳбари ситод, муовин ва аъзои он тасдиқ гардид.

Сипас дар асоси талаботи моддаи 31-и Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» номзадии Камолзода Илҳом Икром ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Сомонӣ, №8 ба муҳокимаи аъзои Кумитаи иҷроия пешниҳод гардид.

АКС: Кумитаи иҷроияи Ҳизби Халқии Демократии Тоҷикистон дар ноҳияи Рӯдакӣ