Номзад аз ҷониби Ҳизби Халқии Демократии Тоҷикистон ба вакилии Маҷлиси намояндагон дар ҳавзаи интихоботии якмандатаи Фирдавсӣ №1 пешбарӣ гардид

ДУШАНБЕ, 04.01.2025 /АМИТ «Ховар»/. Номзадии Сиёвуш Наботзода аз ҷониби Ҳизби Халқии Демократии Тоҷикистон ба вакилии Маҷлиси намояндагон дар ҳавзаи интихоботии якмандатаи Фирдавсӣ №1 пешбарӣ гардид. Қарори дахлдор дар Маҷлиси Кумитаи иҷроияи Ҳизби Халқии Демократии Тоҷикистон дар ноҳияи Фирдавсӣ, ки 3 январ баргузор гардид, қабул карда шуд. Дар ин хусус ба АМИТ «Ховар» мудири шуъбаи  таблиғот ва иттилооти Кумитаи иҷроияи Ҳизби Халқии Демократии Тоҷикистон дар ноҳияи Фирдавсӣ Муслим Усмонзода хабар дод.

Дар рӯзномаи маҷлис масъалаҳо вобаста ба шарҳу тавзеҳи Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 28 декабри соли 2024, пешбарии номзад ба вакили Маҷлиси намояндагони Маҷлиси Олии Ҷумҳури Тоҷикистон дар ҳавзаи интихоботии якмандатаи Фирдавсӣ №1 ва таъсиси Ситоди  пешазинтихоботии Кумитаи иҷроияи Ҳизби Халқии Демократии Тоҷикистон дар ноҳияи Фирдавсӣ мавриди баррасӣ қарор дода шуд.

Таъкид карда шуд, ки тибқи моддаи 31-и Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон»,  пешбарии номзадҳо ба вакили Маҷлиси намояндагони Маҷлиси Олии Ҷумҳурии Тоҷикистон дар ҳавзаи интихоботии якмандата аз ҷониби ҳизбҳои сиёсӣ тавассути Маҷлиси Кумитаи иҷроия (пленум) ва конференсияҳои онҳо доир шуда, 60 рӯз пеш аз интихобот оғоз мегардад ва 45 рӯз то интихобот ба охир мерасад.

Дар маҷлис номзадии Сиёвуш Наботзода аз ҷониби Ҳизби Халқии Демократии Тоҷикистон ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаи интихоботии якмандатаи Фирдавсӣ №1 пешбарӣ гардида, ба тариқи овоздиҳии пинҳонӣ дастгирӣ ёфт.

Инчунин дар маҷлис ситоди пешазинтихоботии Кумитаи иҷроияи Ҳизби Халқии Демократии Тоҷикистон дар ноҳияи Фирдавсӣ тасдиқ гардид.

Муовини якуми Раиси Ҳизби Халқии Демократии Тоҷикистон Маликшо Неъматзода иброз дошт, ки барои амалӣ гардидани талаботи Оинномаю барномаи ҳизб ва дастуру супоришҳои Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон аз ҳамаи имкониятҳои мавҷуда истифода бурда, мавқеи Ҳизби Халқии Демократии Тоҷикистонро дар ҷомеа боз ҳам пойдору мустаҳкам менамоем.

Дар фарҷом оид ба масъалаи баррасигардида қарорҳои дахлдор қабул карда шуданд.

АКС: Кумитаи иҷроияи Ҳизби Халқии Демократии Тоҷикистон дар ноҳияи Фирдавсӣ