Номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Истаравшан, №23 пешниҳод карда шуд

ДУШАНБЕ, 09.01.2025. /АМИТ «Ховар»/. 8 январ дар шаҳри Истаравшани вилояти Суғд маҷлиси якҷояи кумитаҳои иҷроияи Ҳизби Халқии Демократии Тоҷикистон дар шаҳри Истаравшан ва ноҳияи Шаҳристон баргузор гардид, хабар медиҳад АМИТ «Ховар».

Дар маҷлис масъалаҳои зерин, аз ҷумла баррасии вазифаҳои ташкилоти ҳизбӣ барои тарғиб ва амалигардонии нуктаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, ташкили Ситоди пешазинтихоботии назди Кумитаи иҷроияи ҳизбии шаҳри Истаравшан, пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Истаравшан №23 ва барномаи пешазинтихоботии Ҳизби Халқии Демократии Тоҷикистон мавриди муҳокима қарор дода шуданд.

Таъкид гардид, ки моддаҳои 30 ва 31 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» ба ҳизбҳои сиёсӣ имконият медиҳанд, ки 60 рӯз пеш аз интихобот ва 45 рӯз мондан то интихобот номзад ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаҳои якмандатии интихоботро пешбарӣ намоянд.

Вобаста ба ин, номзадии Шӯҳрат Аҳрорзода барои пешбарӣ ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Истаравшан, №23 пешниҳод карда шуд.

Сипас, бо овоздиҳии пинҳонӣ аъзои кумитаҳои иҷроияи Ҳизби Халқии Демократии Тоҷикистон дар шаҳри Истаравшан ва ноҳияи Шаҳристон ҷиҳати пешбарии номзад аз ҳавзаи интихоботии якмандатии Истаравшан, №23 Шӯҳрат Аҳрорзода раъй доданд.

АКС: Ҳизби Халқии Демократии Тоҷикистон