Дар Конибодом бо усули «Мактаб ба мактаб» бо хонандагону волидайн вохӯриҳо баргузор мегарданд

ДУШАНБЕ, 02.02.2025 /АМИТ «Ховар»/. Гурӯҳи кории Мақомоти иҷроияи ҳокимияти давлатии шаҳри Конибодом дар ҳамбастагӣ бо сохторҳои дахлдор бо усули «Мактаб ба мактаб» бо хонандагон, омӯзгорон ва падару модарон вохӯрию суҳбатҳо мегузаронад.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Конибодом хабар медиҳад, чунин вохӯриҳо дар муассисаҳои таҳсилоти миёнаи умумии рақами 49 ва 54  бо иштироки муовини раиси шаҳр бо ҷамъи васеи падару модарону хонандагон доир гардиданд.

Дар вохӯриҳо муҳтавои қонунҳои Ҷумҳурии Тоҷикистон «Дар бораи масъулият барои таълиму тарбияи кӯдак», «Дар бораи маориф» ва «Дар бораи тарбияи ватандӯстии шаҳрвандон» фаҳмонида  шуданд.

Инчунин дар вохӯрӣ масъалаҳои пешгирии омилҳои номатлуб байни наврасону ҷавонон, ҷинояткорӣ, пешгирии онҳо аз ҳамроҳшавӣ ба гурӯҳҳои экстремистию террористӣ, ҷалби падару модарон ба таълиму тарбияи фарзанд, ҳатмӣ будани таҳсил дар зинаи сеюми таҳсил ва дигар масъалаҳои мубрами рӯз муҳокима гардиданд.

 АКС: Мақомоти иҷроияи ҳокимияти давлатии шаҳри Конибодом