ИНТИХОБОТИ ВАКИЛОНИ ХАЛҚ-2025. Омодагӣ ба интихобот ва иштироки мушоҳидони байналмилалӣ аз ИДМ баррасӣ шуд

ДУШАНБЕ, 10.02.2025 /АМИТ «Ховар»/. 8 феврал мулоқоти Раиси Комиссияи марказии интихобот ва раъйпурсии Ҷумҳурии Тоҷикистон Бахтиёр Худоёрзода бо муовини Дабири кулли Иттиҳоди Давлатҳои Мустақил Нурлан Сейтимов, ки бо мақсади оғози  фаъолияти ҳайати мушоҳидони байналмилалӣ аз Иттиҳоди Давлатҳои Мустақил дар интихоботи даъвати нави вакилони Маҷлиси намояндагони Маҷлиси Олии Ҷумҳурии Тоҷикистон омадаанд, баргузор гардид.

Тавре ба АМИТ «Ховар» аз Комиссияи марказии интихобот ва раъйпурсӣ хабар доданд, дар  мулоқот масъалаҳои омодагӣ ба баргузории интихобот, фаъолияти комиссияҳои интихоботӣ, раванди пешбарӣ ва бақайдгирии номзадҳо ба вакилии Маҷлиси намояндагони Маҷлиси Олии Ҷумҳурии Тоҷикистон ва иштироки ҳайати мушоҳидони байналмилалӣ дар ин раванд мавриди баррасӣ қарор гирифт.

Нурлан Сейтимов иброз дошт, ки ҳайати мушоҳидони байналмилалӣ аз Иттиҳоди Давлатҳои Мустақил барои мушоҳидаи дарозмуддат ва кӯтоҳмуддати раванди интихобот ба Ҷумҳурии Тоҷикистон ҷалб шуд. Раванди интихоботро дар Тоҷикистон 10  мушоҳид ба таври дарозмуддат ва 120 нафар ба таври кӯтоҳмуддат мушоҳида менамоянд. Онҳо бе дахолат ба кори комиссияҳои интихоботӣ ва раванди интихобот фаъолият мекунанд.

Мушоҳидон ба шаҳру ноҳияҳо сафар намуда, бо фаъолияти комиссияҳои ҳавзавӣ ва участкавии интихоботи вакилони Маҷлиси намояндагон шинос мешаванд. Инчунин 2 марти соли 2025 дар участкаҳои интихоботӣ ҷараёни овоздиҳиро мушоҳида мекунанд.

АКС: АМИТ «Ховар»