ИНТИХОБОТИ ВАКИЛОНИ ХАЛҚ-2025. Шаҳрвандон барои овоз додан бояд ба участкаи интихоботи маҳалли зисташон раванд

ДУШАНБЕ, 24.02.2025. /АМИТ «Ховар»/. Маҳалли истиқомати шаҳрванд ба участкаи дахлдори интихобот вобаста карда шудааст. Аз ин хотир шаҳрвандон бояд ба участкаи интихоботи маҳалли зист ҳозир шуда, бо рӯйхати интихобкунандагони участкаи интихобот шинос шаванд.

Тавре аз Комиссияи марказии интихобот ва райъпурсии Ҷумҳурии Тоҷикистон хабар доданд, шаҳрвандон бояд дар рӯйхати интихобкунандагони участкаи интихобот насабу номи худро ёфта, дуруст будани онҳоро санҷад. Агар насабу номи шаҳрванд дар рӯйхат набошад, ҳуҷҷатҳоеро, ки шахсият ва ҷойи истиқоматашонро муайян мекунанд, пешниҳод намояд ва талаб кунад, ки ӯро ба рӯйхати интихобкунандагон дохил намоянд.

Ёдовар мешавем, ки барои ташкил ва гузаронидани интихоботи вакилони Маҷлиси намояндагони Маҷлиси Олии Ҷумҳурии Тоҷикистон аз ҷониби Комиссияи марказии интихобот ва раъйпурсӣ 41 ҳавзаи якмандатии интихобот ва 3513 участкаи интихоботӣ таъсис дода шудаанд. Комиссияҳои ҳавзавӣ ва участкавии интихобот тибқи талаботи қонунгузории Ҷумҳурии Тоҷикистон дар бораи интихобот фаъолият мекунанд.

Ёдовар мешавем, ки Фармони Президенти Ҷумҳурии Тоҷикистон аз 4 декабри соли 2024 «Дар бораи таъйини интихоботи даъвати нави Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ қабул гардид, ки тибқи он интихоботи даъвати нави вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои вакилони халқи Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо 2 марти соли 2025 таъйин карда шуда, интихоботи даъвати нави аъзои Маҷлиси миллии Маҷлиси Олии Ҷумҳурии Тоҷикистон 28 марти соли 2025 таъйин гардид.

Зарангези ЛАТИФ,
АМИТ «Ховар»

АКС: АМИТ «Ховар»