Раванди сабти тӯйҳои домодию арӯсӣ ва маросими азодорӣ пурра ройгон мебошад
ДУШАНБЕ, 01.02.2025 /АМИТ «Ховар»/. Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон дар ҳошияи нақшаи чорабиниҳои гузаштан ба ҳукумати электронӣ сабти маъракаҳоро аз моҳи сентябри соли 2024 ба таври онлайн амалӣ менамояд. То имрӯз 6 ҳазор маъракаю маросим дар портали ягонаи мазкур сабт шудааст. Дар ин хусус 31 январ зимни нишасти матбуотӣ сардори Раёсати танзими анъана ва ҷашну маросими кумита Далер Ҷабборов дар посух ба суоли мухбири АМИТ «Ховар» иттилоъ дод.
Ба иттилои Далер Ҷабборов, бо мақсади гузаштан ба низоми хизматрасонии электронӣ Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон тасмим гирифт, ки ба низоми бақайдгирии электронии маъракаю маросим шуруъ кунад. «Сабти онлайнии маъракаю маросими шаҳрвандон шуруъ аз моҳи сентябри соли 2024 шуруъ шуд. Барои дар амал иҷро шудан ва огаҳӣ ёфтани сокинони ҷумҳурӣ аз ин портал мо тариқи смс-паёмакҳо ва шабакаҳои иҷтимоӣ онҳоро огоҳ намудем. Минбаъд шаҳрвандон метавонанд, ки бевосита ба сомонаи www.tanzim.tj ворид шуда, маъракаю маросими худро тавассути ин портал сабт кунанд ва тавсиянома ба даст оранд»,-шарҳ дод номбурда.
Бояд гуфт, ки сабти ҷашн ва маросим ба таври онлайн ба шаҳрвандон имкон медиҳад, ки пеш аз баргузории ҷашну тӯйҳо ба мақомоти иҷроияи ҳокимияти давлатии шаҳру ноҳияҳо ва ҷамоатҳо нарафта, дар ин портал маъракаи худро ба қайд гиранд. Раванди бақайдгирии тӯйҳои домодию арусӣ ва маросими азодорӣ пурра ройгон мебошад.
Тибқи талаботи моддаи 12-и Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» (тӯйҳои домодию арӯсӣ), баргузории танҳо як маърака бо оростани зиёфат барои то 150 нафар ва додани оши тӯй барои то 200 нафар аз ҳисоби ҳарду ҷониб иҷозат дода шуда, ташкили маъракаҳои фотиҳаи тӯй, маслиҳатошӣ, идонабарӣ, сандуқбарон, сарупобинон, чойгаштак, раисталбон, қудоталбон, ноншиканон, хонакашон, модарталбон, падарталбон, рӯйбинон ва муборакбодӣ манъ аст. Ҳамзамон маросими домодталбон ва арӯсбинон ба таври ихтиёрӣ дар доираи оила бо иштироки то 15 нафар гузаронида мешавад.
Шаҳлои САДРИДДИН,
АМИТ «Ховар»
АКС: АМИТ «Ховар»
Муассисаҳои таҳсилоти ибтидоӣ ва миёнаи касбии Тоҷикистон бо озмоишгоҳҳои муосири таълимӣ таъмин гардиданд
Таҳкими ҳамкорӣ дар самти рушди ғизои мактабӣ бо намояндагони Барномаи озуқавории ҷаҳонии СММ баррасӣ гардид
150 нафар соҳиби шаҳодатномаи маҳфили «Пайравони Пешвои миллат» гардиданд
ОГОҲӢ! Аз 6 то 8 июн дар баъзе минтақаҳои Тоҷикистон омадани сел пешгӯӣ мешавад
Татбиқи лоиҳаи «Таҳсилоти касбию техникӣ ва омӯзиш дар минтақаҳои кӯҳии Ҷумҳурии Тоҷикистон» баррасӣ гардид
Дар Кӯлоб аксари иншооти аз офати табиӣ осебдида барқарор гардида, оилаҳои зарардида соҳиби хонаҳои нав мешаванд
Дар Душанбе Форуми соҳибкории занон, сармоягузорӣ ва технология оғоз гардид
ТАЪТИЛИ ТОБИСТОНА. 24 истироҳатгоҳи мавсимии беруназшаҳрӣ барои қабули кӯдакону наврасон омода мебошанд
Дар ноҳияи Айнӣ пайомадҳои офати табиӣ бартараф мегарданд
Нахустин ҷаласаи Раёсати Шурои ҷамъиятии «Занони Тоҷикистон» баргузор шуд
Дар шаҳри Хуҷанд мавсими нави оббозӣ дар шиногоҳи соҳили дарёи Сир оғоз гардид
ОГОҲӢ! Аз 3 то 5 июн дар баъзе минтақаҳои Тоҷикистон омадани селҳои хусусияти маҳаллидошта пешгӯӣ мешавад
