Роҳбарони ҳизбҳои сиёсӣ бо интихобкунандагони ҳавзаи интихоботии якмандатаи Шоҳмансур №3 вохӯрӣ намуданд

ДУШАНБЕ, 26.02.2025. /АМИТ «Ховар»/. Бо ташаббуси Комиссияи ҳавзавии интихоботии якмандатаи Шоҳмансур №3 оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон дар Донишгоҳи миллии Тоҷикистон бо интихобкунандагони ҳудуди ҳавзаи интихоботии якмандатаи Шоҳмансур №3 вохӯрӣ баргузор шуд. Дар ин хусус ба АМИТ «Ховар» аз Комиссияи ҳавзавии интихоботии якмандатаи Шоҳмансур №3 хабар доданд.

Раиси Комиссияи ҳавзавии интихоботии якмандатаи Шоҳмансур №3 оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон иброз намуд, ки Тоҷикистон ҳамчун мамлакати дар масири таҳкими демократия қарордошта давоми солҳои соҳибистиқлолӣ барои тақвияти мавқеи ниҳоди интихобот дар ҷомеа, боло бурдани эътимоди мардум ба интихобот ҳамчун маъракаи муҳимми сиёсӣ ва таъмини татбиқи самараноки ҳуқуқи интихоботии шаҳрвандон тадбирҳои бунёдӣ меандешад. Дар натиҷа ниҳоди интихобот дар Тоҷикистон ҳамчун ниҳоди низомсоз эътироф шудааст ва дар шакли комил ташаккул ёфта, фаъолият дорад.

Роҳбарони ҳизбҳои сиёсӣ ва намояндагони онҳо барномаҳои пешазинтихоботии ҳизбҳоро муаррифӣ намуда, изҳор доштанд, ки давлат ба шаҳрвандон, номзадҳо, ҳизбҳои сиёсӣ дар давраи пеш аз интихобот бе мамониат ташвиқот бурданро мувофиқи қонунгузории Ҷумҳурии Тоҷикистон таъмин менамояд.

Ин аст, ки шуруъ аз 10 феврали соли 2025 дар ҳудуди участка ва ҳавзаҳои интихоботӣ вохӯрии ҳизбҳои сиёсӣ, номзадҳои дар ҳавзаҳои якмандата бақайдгирифта ва шахсони боэътимоди онҳо бемамониат таблиғоти пешазинтихоботиашонро баргузор намуданд.

АКС: Комиссияи ҳавзавии интихоботии якмандатаи Шоҳмансур №3