Роҳиоҳанчиёни мамлакат нишондиҳандаҳои Паёми Президенти Тоҷикистонро иҷро менамоянд

ДУШАНБЕ, 20.02.2025 /АМИТ «Ховар»/. Ба давлати транзитӣ табдил додани Тоҷикистон ва истифодаи имконоти транзитии он ҳамчун яке аз ҳадафҳои асосии рушду пешрафти иқтисодиёти мамлакат пазируфта шудааст. Ин нукта дар ҳамоише, ки имрӯз дар Корхонаи воҳиди давлатии «Роҳи оҳани Тоҷикистон» бо мақсади таъмини иҷрои нишондиҳандаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон» баргузор гардид, баён шуд.

АМИТ «Ховар» бо истинод ба Корхонаи воҳиди давлатии «Роҳи оҳани Тоҷикистон» иттилоъ медиҳад, ки дар ҳамоиш роҳбарияти Роҳи оҳани Тоҷикистон, кумитаи иҷроияи Ҳизби Халқии Демократии Тоҷикистон дар шаҳри Душанбе ва Прокуратураи нақлиёти Тоҷикистон доир ба самтҳои афзалиятноки Паёми Президенти Ҷумҳурии Тоҷикистон ба Маҷлиси Олӣ ва нақши он дар рушду пешрафти иқтисодиёти мамлакат, хусусан дар самти татбиқи яке аз ҳадафҳои муҳими стратегии Ҳукумати Ҷумҳурии Тоҷикистон- баромадан аз бунбасти коммуникатсионӣ ва ба давлати транзитӣ ва воҳид табдил додани мамлакат сухан гуфтанд.

Иброз гардид, ки маҳз дар солҳои Истиқлолияти давлатӣ бо шарофати сиёсати бунёдкоронаи Президенти Ҷумҳурии Тоҷикистон муҳтарам Эмомалӣ Раҳмон дар мамлакат даҳҳо километр роҳҳои оҳан бунёд гардида, инфрасохтори роҳи оҳани мамлакат таҷдид гардид, сатҳу сифати хизматрасонӣ ба мусофирон ва боркашонӣ тавассути роҳи оҳани мамлакат баланд бардошта шуд. Инчунин дар ин давра садҳо мутахассисони касбӣ дар соҳаи роҳи оҳан омода шуданд, ки ба дурнамои рушди соҳаи роҳи оҳани Тоҷикистон ва дар маҷмуъ ба густариш ва болоравии сатҳи иқтисоди миллӣ мусоидат намуд.

Дар анҷоми ҳамоиш таъкид шуд, ки ҳайати кормандону мутахассисони Корхонаи воҳиди давлатии «Роҳи оҳани Тоҷикистон» Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷӣ»-ро сармашқи фаъолият қарор дода, бо мақсади таъмини нишондиҳандаҳои он ва бо истифода аз имконияту шароити мавҷудаи корӣ тамоми неру ва саъю талошро барои баланд бардоштани сатҳи хизматрасонӣ ва рушди соҳаи роҳи оҳани Тоҷикистон равона менамоянд.

АКС: Корхонаи воҳиди давлатии «Роҳи оҳани Тоҷикистон»