Дар Донишгоҳи давлатии Бохтар бахшида ба Рӯзи байналмилалии ҳифзи пиряхҳо ҳамоиш доир шуд

БОХТАР, 21.03.2025. /АМИТ «Ховар»/. Дар Донишгоҳи давлатии Бохтар ба номи Носири Хусрав бахшида ба 21 март- Рӯзи байналмилалии ҳифзи пиряхҳо таҳти унвони «Ҳифзи пиряхҳо — асоси таъмини об, озуқаворӣ, энергетика ва амнияти экологӣ» конфронси илмӣ — амалӣ баргузор гардид. Дар ин хусус ба АМИТ «Ховар» аз ин донишгоҳ хабар доданд.

Дар саҳни донишгоҳ намоиши ҷашнӣ ба ифтихори Соли байналмилалии ҳифзи пиряхҳо эълон гардидани соли 2025, ҳамчун Рӯзи байналмилалии пиряхҳо қабул шудани 21 март ва ҳамзамон бо мақсади муаррифии шоистаи ташаббусҳои ҷаҳонии Президенти Ҷумҳурии Тоҷикистон муҳтарам Эмомалӣ Раҳмон дар соҳаи обу иқлим ва ҳифзи пиряхҳо доир гардид.

Дар намоиш дастовардҳои хонандагони муассисаҳои таҳсилоти миёнаи умумии шаҳри Бохтар, беҳтарин намунаҳои осори санъати тасвирӣ, ки аз ҷониби хонандагон офарида шудаанд ва дар онҳо обҳои мусаффо, кӯҳҳои осмонбӯс, дарёву чашмасорон, пиряхҳо ва дигар зебоиҳои диёр тасвир гардидаанд, ба маърази тамошо гузошта шуданд.

Дар ҳамоиш доир ба аҳамияти ҳифзи пиряхҳо дар шароити тағйирёбии иқлим ва ташаббусҳои ҷаҳонии Пешвои миллат ибрози назар карда шуд. Гуфта шуд, ки Президенти Ҷумҳурии Тоҷикистон муҳтарам Эмомалӣ Раҳмон пиряхҳоро захираи асосии оби соф арзёбӣ намуда, изҳор доштанд, ки обшавии босуръати онҳо дар баробари зиёдшавии истеъмоли об, ки бо афзоиши аҳолӣ ва рушди иқтисодӣ вобастагӣ дорад, метавонад ба оқибатҳои ниҳоят манфӣ оварда расонад.

Ҷумҳурии Тоҷикистон ҳамчун давлати ташаббускор дар ҳалли масъалаҳои обу иқлим шинохта шудааст. Қабул гардидани Соли байналмилалии «Оби тоза, соли 2003», Даҳсолаи байналмилалии амал «Об барои ҳаёт, солҳои 2005-2015», «Соли байналмилалии ҳамкорӣ дар соҳаи об, соли 2013» ва Даҳсолаи байналмилалии амал «Об барои рушди устувор, солҳои 2018-2028» далели бебаҳси ташаббускории ҷумҳурии мо мебошанд.

АКС: Донишгоҳи давлатии Бохтар ба номи Носири Хусрав