Дар Майдони «Истиқлол» барномаи фарҳангии фараҳафзо баргузор гардид

ДУШАНБЕ, 21.03.2025 /АМИТ «Ховар»/. Шоми имрӯз бахшида ба Ҷашни байналмилалии Наврӯз дар маҷмааи Майдони «Истиқлол»-и шаҳри Душанбе консерти идонаи наврӯзӣ баргузор шуд. Тантанаҳои наврӯзӣ бо шукуҳу шаҳомати хосса ва хеле фараҳбахш баргузор гардида, аз дидани он хотири тамошобинон хурсанду болида гардид, иттилоъ медиҳад АМИТ «Ховар».

Бояд гуфт, ки имрӯзҳо Ҷашни байналмилалии Наврӯз дар тамоми қаламрави пойтахт, ноҳия, маҳалла ва шаҳракҳо тавассути  барномаҳои  пуршукуҳи идона, баргузории  барномаҳои ҳунарӣ бо ҳисси ифтихор аз  ватану шукуфоии  мамлакат ва  арҷ  гузоштан ба мероси пурғановати ниёгон  таҷлил мегардад.

Иброз гардид, ки Наврӯз ҷашни сирф табиӣ, рамзи бедории табиат, пайванди ногусастанию ҷовидонаи инсон бо табиат ва пайки шодиву сурури хурду бузурги мардумамон мебошад. Бинобар ин, мо онро ҳамчун мероси пурғановати фарҳангиамон на фақат таҷлил менамоем, балки барои омӯхтану барқарор кардани ойину русуми азбайнрафтаи он талош менамоем.

Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст. Халқу миллатҳои зиёди дунё ин ҷашнро қабул намуда, онро бо анъанаҳои хоси худ таҷлил менамоянд.

Таъкид шуд,  ки мардуми мо аз замонҳои қадим Наврӯз, яъне ҷашни сари солро, пеш аз ҳама, бо дилу нияти нек, яъне бо ботини тоза, сипас, бо зоҳири ороста, яъне сарулибоси тозаву озода истиқбол мегирифтанд ва ҳамеша умед доштанд, ки қадами соли нав бо файзу баракат шавад. Хушбахтона, ин русуми хуби наврӯзӣ ҳоло дар мамлакати биҳиштосои мо ривоҷи тоза пайдо намудааст.

Бояд гуфт, ки барномаи фарҳангӣ бо шаҳомати хосса доир шуда, ба иштирокчиёни ин ҷашн шодиву нишоти беандоза бахшид, ки сарчашмаи асосии он сулҳу суботи комил ва ваҳдати миллӣ дар саросари Тоҷикистони азиз мебошад.

АКС аз манбаъҳои боз