Дар вилояти Суғд бахшида ба Рӯзи Модар ҳамоиши тантанавӣ баргузор гардид

ДУШАНБЕ, 07.03.2025 /АМИТ «Ховар»/.  Мо ифтихор мекунем, ки модари тоҷик давоми тамоми таърих тарбиятгари фарзандони нобиғаву хирадманд, солеҳу поктинат, бофазлу соҳибмаърифат, ватандӯсту ватанпарвар ва ҳунарманду созанда буда, ин рисолати муқаддаси худро имрӯз низ бошарафона идома мебахшад. Ин аст, ки имрӯз дар вилояти Суғд занони зиёде дар вазифаҳои роҳбарикунанда ва мақомоти давлатӣ  фаъолият менамоянд. Дар ин хусус 6 март зимни баргузории  ҳамоиши тантанавӣ бахшида ба Рӯзи Модар дар вилояти Суғд иттилоъ дода шуд.

Раиси вилояти Суғд Раҷаббой Аҳмадзода изҳор намуд, ки Модар рамзи ҷовидонаи меҳру вафо ва идомабахши насли инсон мебошад. Ӯ аввалин шахсест, ки бо муҳаббати пок ва меҳрубонии бекаронаш дар қалби тифли худ хислатҳои неки инсониро парвариш дода, ӯро ба шоҳроҳи зиндагӣ роҳнамоӣ менамояд.

Дар ҳамоиш баён гардид, ки имрӯз модари тоҷик дар баробари иҷрои рисолати аслӣ- тарбияи насли ояндасоз, инчунин сиёсатмадору олим, омӯзгору табиб, ҳунарманду варзишгар, соҳибкори муваффақу коршинос буда, дар рушди ҳаёти сиёсию иқтисодӣ ва иҷтимоиву фарҳангӣ, яъне дар ободии мамлакат саҳми басе арзишманд дорад.

Дар сатҳи давлатӣ ва бо тантанаю шукуҳи хосса ҷашн гирифтани Рӯзи Модар нишони эътибору эҳтироми зиёди давлат ва Ҳукумати мамлакат нисбат ба модарону занон мебошад. Зеро нақши занон дар ободии хонадон, тарбия намудану ба воя расонидани фарзандон, ба онҳо омӯзонидани забони модарӣ, одобу ахлоқ, парвариши эҳсоси баланди худшиносию худогоҳӣ, ҳисси миллӣ ва ифтихори ватандӯстӣ беназир аст.

Сипас, аз ҷониби аҳли фарҳанг барномаи рангини консертӣ пешниҳод гардида, дар васфи бузургию меҳрубониҳои Модар сурудҳо танинандоз шуданд.

АКС: Хадамоти матбуоти Раиси вилояти Суғд