IRS: Роҳи Душанбе-Чанок бинобар мавҷуд будани хавфи тармафароӣ муваққатан баста шудааст

ДУШАНБЕ, 03.03.2025. /АМИТ «Ховар»/. Дар натиҷаи бориши пуршиддату давомдори барф дар роҳи Душанбе-Чанок 13 тармаи хурду калон фаромад. Бинобар то ҳол мавҷуд будани хавфи тармафароӣ ҳаракати нақлиёт дар ин масир муваққатан маҳдуд карда шудааст. Дар ин хусус АМИТ «Ховар» бо истинод ба Филиали «Инновейтив Роуд Солюшнз ЛТД» дар Ҷумҳурии Тоҷикистон хабар медиҳад.

Ба иттилои манбаъ, шаби гузашта бо кумаки кормандони филиал 7 мошин аз тарма раҳо гардид. Хушбахтона,  талафоти ҷонӣ ба қайд гирифта нашудааст. Баландии барф дар баъзе қитъаҳои ин роҳ ба 60 сантиметр расидааст.

Тавре иттилоъ дода шуд, дар фосилаи маҳдуд будани ҳаркати роҳи нақлиёт кормандони Филиали «Инновейтив Роуд Солюшнз ЛТД» дар Ҷумҳурии Тоҷикистон оқибатҳои тармафароиро пурра бартараф ва роҳро бо маводи зиддилағзиш коркард менамоянд.

Баробари рафъ гардидани монеаҳо аз кушода шудани роҳ иттилоъ медиҳем.

АКС: Филиали «Инновейтив Роуд Солюшнз ЛТД» дар Ҷумҳурии Тоҷикистон