Рӯзи Модарро дар Кумитаи рушди сайёҳии Тоҷикистон ба таври тантанавӣ таҷлил намуданд

ДУШАНБЕ, 08.03.2025. /АМИТ «Ховар»/. 6 март дар Кумитаи рушди сайёҳии назди Ҳукумати Ҷумҳурии Тоҷикистон бахшида ба Рӯзи Модар ҷамъомади тантанавӣ баргузор гардид. Дар ин хусус АМИТ «Ховар» бо истинод ба ин кумита хабар медиҳад.

Раиси Кумитаи рушди сайёҳии назди Ҳукумати Ҷумҳурии Тоҷикистон Ҷамшед Ҷумъахонзода иброз дошт, ки маҳз бо шарофати талошу заҳматҳои Президенти Ҷумҳурии Тоҷикистон муҳтарам Эмомалӣ Раҳмон дар сатҳи давлатӣ ва бо тантанаю шукуҳи хосса ҷашн гирифтани Рӯзи Модар нишонаи эътибору эҳтироми зиёди давлат ва Ҳукумати мамлакат нисбат ба занону духтарон мебошад.

Зимни ҷамъомад нақши онҳо дар ободии хонадон, тарбия намудан ва ба воя расонидани фарзандон, ба онҳо омӯзонидани забони модарӣ, одобу маънавиёт, бедор намудани эҳсоси баланди худшиносию худогоҳӣ, ҳисси миллӣ ва ифтихори ватандӯстӣ беназир арзёбӣ гардид.

«Модар рамзи ҷовидонаи меҳру вафо ва идомабахши насли инсон мебошад. Маҳз ба ҳамин хотир ҳар фарди тарбиятдидаю оқил тамоми умри худро бо ҳастии Модар пайванд медонад, ӯро дӯст медорад ва ранҷу азияти кашидаи модарро то лаҳзаи охирини ҳаёт қадршиносию посдорӣ менамояд»,-гуфта шуд дар ҳамоиш.

Ҳамчунин иброз гардид, ки сиёсати имрӯзаи давлату миллат, аз ҷумла Пешвои миллат муҳтарам Эмомалӣ Раҳмон дар Тоҷикистон ва берун аз он ба мавқеи зан арҷ гузоштанро талқин менамояд, зеро Зан-Модар тарбиятгари инсоният буда, сарсабзӣ ва ободии рӯзгори аҳли башар ба занон алоқамандӣ дорад.

АКС: Кумитаи рушди сайёҳии назди Ҳукумати Ҷумҳурии Тоҷикистон