Сарвари давлат Эмомалӣ Раҳмон дар ноҳияи Бобоҷон Ғафуров ба фаъолияти Корхонаи истеҳсоли равғани ҶСП «Зуҳал» оғоз бахшиданд

ДУШАНБЕ, 29.03.2025 /АМИТ «Ховар»/. 29 март Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ноҳияи Бобоҷон Ғафуров ба фаъолияти Корхонаи истеҳсоли равғани Ҷамъияти саҳҳомии пӯшидаи Зуҳал оғоз бахшиданд.

Иншоот дар доираи татбиқи ҳадафи чоруми миллӣ — саноатикунонии босуръати мамлакат бунёд гардида, иқтидори лоиҳавии он дар як шабонарӯз 40 тонна равғани растанӣ мебошад.

Дар корхона 40 сокини маҳаллӣ бо кор ва маоши хуб таъмин гардид.

Хатти истеҳсолӣ аз дегҳои бухорӣ, сехи равғантозакунӣ, омода намудани қуттиҳои пластикӣ ва бандубаст иборат буда, маҳсулот дар зарфҳои аз як то панҷлитра вориди бозори истеъмолӣ мешавад.

Корхона бо мақсади таъмини талаботи сокинон бо маҳсулоти ватанӣ ва дорои сифати баланд таъсис ёфта, дар он аз рапс, офтобпараст, сиёҳдона ва чигит равған истеҳсол мешавад.

Ба таъкиди мутахассисони соҳа, ба кор оғоз намудани корхона метавонад, ҳамчунин, ба коҳиши воридоти хӯроки паранда аз хориҷи кишвар мусоидат намояд, зеро кунҷораи истеҳсолшуда, ки дар таркибаш беш аз 6 фоиз равған дорад ба фабрикаҳои парандапарварӣ бо нархи нистбатан арзон пешниҳод карда мешавад.

Пешвои миллат муҳтарам Эмомалӣ Раҳмон ба масъулин барои афзун намудани ҳаҷми маҳсулот, таъсиси ҷойҳои нави корӣ ва таъмини бозори дохилӣ бо равғани растанӣ тавсияҳои муфид доданд.

Бо таъсиси чунин корхонаҳо имконияти қонеъ намудани талаботи аҳолӣ бо ин навъи маҳсулот бештар шуда, соҳибкорон метавонанд бо истифода аз имтиёзҳои Ҳукумати кишвар истеҳсолоти ватаниро тақвият бахшанд.

Дар ҳамин ҷо Сарвари давлат бо маҳсулоти корхона шинос шуданд. Иттилоъ дода шуд, ки равғани ин корхона дорои сифати баланд буда, аз лиҳози экологӣ тоза ва безарар мебошад.

Сарвари давлат иқдоми созандаи соҳибкори ватаниро шоистаи таҳсин хонда, таъкид доштанд, ки бунёди чунин иншоот ба сатҳи некуаҳволии мардум мусоидат менамояд.

Ҳоло дар шаҳру ноҳияҳои вилояти Суғд, асосан, корхонаҳои азими коркарди пахта ва маҳсулоти ширӣ, гӯштӣ, қаннодӣ, консерваи меваю сабзавот, равғани растанӣ, ранг, мебел, риштаи абрешимӣ, атлас, гӯшти мурғ ва ғайра фаъолият доранд, ки молу маҳсулоташон ба давлатҳои ҳамсоя ва даҳҳо кишварҳои дигар содирот мешавад.