Ёддошти тафоҳум оид ба ҳамкорӣ дар соҳаи байторӣ байни Тоҷикистон ва Қирғизистон ба имзо расид

 ДУШАНБЕ, 14.03.2025 /АМИТ «Ховар»/. 13 март 16 санади нави ҳамкорӣ аз рӯйи натиҷаҳои гуфтушунидҳои сарони давлатҳои Тоҷикистон ва Қирғизистон ба имзо расиданд.

Аз ҷумла, байни Кумитаи бехатарии озуқавории назди Ҳукумати Ҷумҳурии Тоҷикистон ва Инспексияи давлатии бехатарии байторӣ ва фитосанитарии назди Девони вазирони Қирғизистон оид ба ҳамкорӣ дар соҳаи байторӣ Ёддошти тафоҳум ба имзо расид.

Тавре ба АМИТ «Ховар» аз Кумитаи бехатарии озуқаворӣ хабар доданд, Ёддошти тафоҳум бо мақсади густариши ҳамкорӣ дар соҳаи байторӣ барои бехатарӣ аз барангезандаҳои бемориҳои сироятӣ дар ҳудуди ҳарду давлат ва баҳисобгирии мавқеи асосии бахши аграрӣ дар рушди иқтисод ва бехатарии озуқаворӣ қабул гардид.

Дар доираи ин санад ҳамкории ҷонибҳо дар соҳаи байторӣ густариш ёфта, ба тақвият додани фаъолияти илмӣ-таҳқиқотӣ, ташкилу фароҳам овардани шароитбарои барқарор намудани равобити бевоситаи субъектҳои хоҷагидори Ҷумҳурии Тоҷикистон ва Ҷумҳурии Қирғизистон дар воридоту содироти маҳсулоти таҳти карантинӣ, захираҳои моддию техникӣ, баланд бардоштани сатҳи бехатарии озуқаворӣ ва беҳтар намудани вазъи иқтисодиёти мамлакат мусоидат менамояд.

АКС: Хадамоти матбуоти Президенти Ҷумҳурии Тоҷикистон