Дар Маркази такмили ихтисоси кормандони соҳаи тарбияи ҷисмонӣ ва варзиш машғулияти омӯзишӣ оғоз гардид

Апрель 5, 2025 15:25

ДУШАНБЕ, 05.04.2025 /АМИТ «Ховар»/. Муассисаи давлатии «Маркази такмили ихтисоси кормандони соҳаи тарбияи ҷисмонӣ ва варзиш» барои зиёда аз 220 нафар мутахассисони соҳаи варзиш ду машғулияти омӯзишии байналмилалиро дар мавзуъҳои «Фармакологияи варзиш» ва «Травматология ва реабилитатсия» бо истифода аз таҷрибаи мутахассиси эътирофшудаи Федератсияи Русия Юрий Кириллов оғоз намуд, ки то 8 апрел идома меёбанд. Ин машғулият бо дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Донишкадаи тарбияи ҷисмонии Тоҷикистон ба номи Саидмуъмин Раҳимов доир мешаванд.

Муовини якуми Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шабнам Раҳимзода гуфт, ки машғулият дар асоси дастуру супоришҳои Сарвари давлат дар чаҳорчӯбаи иҷрои «Стратегияи рушди варзиши Тоҷикистон то соли 2030» доир мегардад. Барои иштирокчиёни машғулият имконияти мубодилаи таҷрибаи байналмилалӣ фароҳам оварда шудааст, ки дар шароити ҷаҳонишавӣ зарурати стратегӣ дорад. Ғайр аз ин барои омӯзиши усулҳои нави пешгирии истифодаи моддаҳои ғайриқонунӣ дар варзиш ва барқарорсозии ҷисмонии варзишгарон имконияти мусоид фароҳам оварда шудааст.

Машғулияти омӯзишӣ бо мақсади амалӣ намудани нақшаи такмили ихтисоси кормандони соҳаи варзиш, ки 15 феврали соли 2024 тасдиқ шудааст, амалӣ гардида, ду давра — давраи назариявӣ ва амалиро дар бар мегирад.

Дар машғулият асосан мавзуъҳои таҳлили таъсири моддаҳои фармакологӣ, мубориза бо допинг, ҳифзи тандурустии варзишгарон, баррасии қонунҳои нави ҷаҳонӣ дар соҳаи фармакологияи варзишӣ, технологияҳои реабилитатсионии суръатбахш, пешгирии захмҳои варзишӣ, таҷрибаи клиникаҳои тобовари Аврупо ва омӯзиши амалии усулҳои физиотерапия дар толори варзишӣ мавриди таҳлилу баррасӣ қарор мегиранд.

Директори Муассисаи давлатии «Маркази такмили ихтисоси кормандони соҳаи тарбияи ҷисмонӣ ва варзиш»-и назди Кумитаи кор бо ҷавонон ва варзиш Шаҳбози Искандар ин машғулияти омӯзиширо қадами нав дар роҳи рушди сифатии варзиши миллӣ номид.

Таҳияи барномаҳои омӯзишӣ бо иштироки мутахассисони байналмилалӣ нишондиҳандаи таваҷҷуҳи Ҳукумати Тоҷикистон барои афзоиши сатҳи тахассусии кормандон мебошад. Баргузории чунин машғулият на танҳо ба рушди соҳаи варзиш, балки ба таъмини амнияти иҷтимоӣ низ мусоидат менамояд.

Таҳсили мутахассисони маҳаллӣ дар соҳаҳои фармакология ва травматология имконияти пешгирии бемориҳои ҷиддиро фароҳам оварда, сарфаи давлатӣ ба табобатро коҳиш медиҳад. Ин амалиёт бо сиёсати Ҳукумати мамлакат оид ба тарбияи насли ҷавон ва таъмини солимии ҷумҳуриявӣ ҳамоҳангӣ дорад.

Меҳрони ҚУРБОН,
шореҳи варзиши АМИТ «Ховар»

АКС: АМИТ «Ховар»

 

Апрель 5, 2025 15:25

Хабарҳои дигари ин бахш

То 2 май дар баъзе ноҳияҳои Тоҷикистон баландшавии ҳолати ифлосшавии ҳавои атмосфера дар назар аст
Имрӯз дар Тоҷикистон ҳаво то 35 дараҷа гарм мешавад
ИСТИФОДАИ САМАРАНОКИ ЗАМИН. Сокинони шаҳри Бохтар дар замини наздиҳавлигияшон гармхона ташкил намуданд
«IRS» бо мақсади пешгирии қонунвайронкунӣ дар масири Душанбе – Чанок гузаргоҳи назоратӣ таъсис дод
Ба соҳибкори муваффақи тоҷик аз ҷониби Президенти Қазоқистон Медали ҷашнӣ ва Ифтихорномаи фахрӣ супорида шуд
Дар Хатлон нахустин бозиҳои мусобиқаи кӯдаконаи футбол баргузор шуданд
НАҚЛИЁТИ «САБЗ». Ба Тоҷикистон 6047 мошини барқӣ ворид карда шудааст
Кӯчати мағзи устухон дар ҳолати саратони хун ва бемориҳои гематологӣ дар шабакаи клиникаҳои «Acıbadem»
Имрӯз дар шаҳри Душанбе ҳаво то 31 дараҷа гарм мешавад
Барои барқарор намудани чарогоҳҳои водии Рашт 20 намуди тухмиҳои бутта ва дарахтон парвариш карда мешаванд
Дар Ҳисор маҳфил – озмуни «Тоҷикистони ман!» оғоз гардид
Имсол дар Хатлон қариб 500 ҳазор тонна пиёз ҷамъоварӣ карда мешавад