ДАЪВАТИ БАҲОРӢ. Ҷавонони шуҷои шаҳру ноҳияҳои Суғд ба хизмати ҳарбӣ гусел карда шуданд

ДУШАНБЕ, 09.04.2025. /АМИТ «Ховар»/. Ҷавонони шуҷою далери  шаҳру ноҳияҳои вилояти Суғд ба сафи Қувваҳои Мусаллаҳи Ҷумҳурии Тоҷикистон гуселонида шуданд. Дар ин хусус ба АМИТ «Ховар» аз хадамоти матбуоти Раиси вилояти Суғд иттилоъ доданд.

Ҳимояи Ватан, манфиатҳои давлат, таҳкими Истиқлоли давлатӣ ва тақвияти иқтидори мудофиавӣ вазифаи муқаддаси ҳар шаҳрванд маҳсуб мешавад. Хизмати ҳарбӣ на танҳо қарзи фарзандӣ, балки мактаби мардонагӣ ва ватандӯстӣ барои ҳар ҷавонмарди баору номус мебошад.

Дар шароити имрӯза бо талошҳои пайвастаи Ҳукумати мамлакат ва Вазорати мудофиаи Тоҷикистон барои сарбозон шароити мусоиди хизматӣ ва маишӣ фароҳам оварда шудааст.

Иттилоъ дода шуд, ки дар рӯзи нахустини даъвати баҳорӣ ноҳияи Кӯҳистони Мастчоҳ ва якчанд ҷамоати шаҳру ноҳияҳо нақшаи даъватро сарбаландона иҷро намуданд.

Ёдовар мешавем, ки 29 январи соли 2021 дар заминаи меъёрҳои қонуни амалкунанда Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» дар тарҳи нав қабул карда шуд, ки он аз 10 боб ва 62 модда иборат мебошад.

Хизмати ҳарбӣ барои ҷавонписарони аз 18 то 27-сола, ки муассисаҳои миёнаи умумӣ ва миёнаи касбиро хатм намудаанд, 24 моҳ муқаррар карда шудааст. Тибқи талаботи қонун, шаҳрвандоне, ки донишгоҳу донишкадаҳоро бо кафедраҳои ҳарбӣ хатм менамоянд, танҳо баъди 12 моҳи хизмати ҳарбӣ ба онҳо рутбаи аввалини афсарӣ дода мешавад. Зеро онҳо дар кафедраҳои ҳарбӣ ихтисосҳои гуногунро ба таври назариявӣ аз бар карда, ҳамчун мутахассис ба сафи артиш дохил мешаванд. Ҳамзамон дарсҳои назариявиро ба таври амалӣ тақвият бахшида, баъди як соли хизмат сазовори рутбаи аввалини афсарӣ, яъне лейтенанти хурд мегарданд.

АКС: Хадамоти матбуоти Раиси вилояти Суғд