Дар Душанбе ҷаласаи Шурои машваратии роҳбарони хадамоти консулии вазоратҳои корҳои хориҷии ИДМ доир шуд

ДУШАНБЕ, 29.05.2025 /АМИТ «Ховар»/. 28 май  дар Душанбе таҳти раёсати Ҷумҳурии Тоҷикистон ҷаласаи XXXII Шурои машваратии роҳбарони хадамоти консулии вазоратҳои корҳои хориҷии давлатҳои аъзои Иттиҳоди Давлатҳои Мустақил баргузор гардид. Дар ин хусус ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Дар ҷаласаи Шуро   намояндагони Арманистон, Беларус, Қазоқистон, Қирғизистон, Русия, Узбекистон ва Кумитаи иҷроияи Иттиҳоди Давлатҳои Мустақил иштирок намуданд.

Дар ҷараёни мулоқот иштирокчиён масъалаҳои иҷрои муқаррароти Конвенсияи Вена дар бораи муносибатҳои консулӣ аз 24 апрели соли 1963 ва конвенсияҳои дуҷонибаи консулиро баррасӣ карданд. Ҳамчунин мубодилаи афкор оид ба ҳамкорӣ дар доираи Конвенсияи кумаки ҳуқуқӣ ва муносибатҳои ҳуқуқӣ дар парвандаҳои гражданӣ, оилавӣ ва ҷиноятӣ аз 7 октябри соли 2002 анҷом дода шуд.

Дар ин замина дурнамои гузариш ба шакли электронӣ дар хизматрасонии консулӣ, эътирофи ҳуҷҷатҳои электронӣ ва имзоҳои электронии шахсони мансабдори мақомоти дахлдори давлатҳои аъзои Иттиҳоди Давлатҳои Мустақил мавриди баррасӣ қарор гирифт.

АКС: Вазорати корҳои хориҷии Ҷумҳурии Тоҷикистон