Дар Сеул ба ифтихори Рӯзи ҷавонони Тоҷикистон ва Рӯзи ҷаҳонии футбол мусобиқа баргузор гардид

ДУШАНБЕ, 24.05.2025 /АМИТ «Ховар»/. 23 май ба ифтихори Рӯзи ҷавонони Тоҷикистон ва Рӯзи ҷаҳонии футбол бо иштироки донишҷӯёни тоҷик, ҳамватанони муқим ва кормандони Сафорати Ҷумҳурии Тоҷикистон дар Сеул мусобиқаи футбол баргузор гардид, хабар медиҳад АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Корея.

Дар оғози чорабинӣ таъкид гардид, ки бо дастгириву ғамхориҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба хотири соҳиби илму донишҳои муосир ва касбу ҳунарҳои замонавӣ гардидани ҷавонони мамлакат, шароити зарурӣ фароҳам оварда шудаааст.

Сафири Фавқулода ва Мухтори Ҷумҳурии Тоҷикистон дар Ҷумҳурии Корея Салоҳиддин Киром аҳаммияти пешниҳоди Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Федератсияи футболи Тоҷикистон ва Ассостсиатсияи футболи Осиёи Марказӣ (CAFA) муҳтарам Рустами Эмомалиро дар мавриди ҷашнгирии Рӯзи ҷаҳонии футбол, ки аз тарафи Маҷмаи Умумии Созмони Милали Муттаҳид қабул гардид, баён намуд.

Дар мусобиқаи футбол дастаи Донишгоҳи Шинҳан ҷойи якум, тими муштараки донишҷуёни Сеул ва Инчон ҷойи дуюм ва тими Сафорат ҷойи сеюмро ишғол намуданд.

АКС: Сафорати Ҷумҳурии Тоҷикистон дар Ҷумҳурии Корея