IRS ронандагонро даъват менамояд, ки қоидаҳои ҳаракат дар роҳро риоя намоянд

ДУШАНБЕ, 28.05.2025. /АМИТ «Ховар»/. Роҳбарияти Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон тамоми ронандагонро даъват намудааст, ки ҳангоми ҳаракат бодиққат бошанд, муқаррароти мавҷударо риоя намоянд, тавсия ва талаботи Бозрасии давлатии автомобилии Вазорати корҳои дохилии Ҷумҳурии Тоҷикистон, Кумитаи ҳолатҳои фавқулода ва мудофиаи гражданиро дар мадди назар қарор дода, эҳтироми ҳамдигарро ба ҷо оранд.

Тавре ба АМИТ «Ховар» аз Ширкати саҳомии «Инновейтив Роуд Солюшнз ЛТД» хабар доданд, рӯзҳои охир чун дар манотиқи дигари мамлакат  дар масири Душанбе-Чанок низ чанд садамаи нақлиётӣ рух дод, ки мутаассифона, боиси ба ҳалокат расидани шаҳрвандон гардид.

Тибқи хулосаи мақомоти дахлдор,  аз ҷумла Бозрасии давлатии автомобилии Вазорати корҳои дохилии Ҷумҳурии Тоҷикистон аз уҳдаи идораи мошин набаромадан, ба муқобили самти ҳаракат баромадан ва дар хоб мондани ронанда сабабҳои асосии рух додани чунин садамаҳо мебошанд. Мутаассифона, баъзеҳо ин ҷиҳати масъаларо сарфи назар карда,  хулосаи аз ҳақиқати воқеӣ фарсахҳо дур ва муғризона мебароранд.

Дар баробари корҳои дигари марбут ба нигоҳдории роҳи Душанбе-Чанок бо дастури роҳбарияти филиали ширкат ба корҳои фаҳмондадиҳӣ низ таваҷҷуҳи хосса зоҳир гардидааст. Ба таври густурда гузаронидани корҳои фаҳмондадиҳӣ дар воситаҳои ахбори омма,  шабакаҳои иҷтимоӣ ва насби банерҳо бо аксу навиштаҷоти ҳушдордиҳанда далели ин гуфтаҳо мебошад.

АКС: Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон